Aktori i madh Robert Ndrenika në një dalje për mediat ka folur gjerë e gjatë për zhvendosjen e Teatrit Kombëtar në një godinë tjetër, tek Turbina. Ky vendim i Ministrisë së Kulturës është kundërshtuar fort nga aktorët dhe nga Ndrenika, gjatë mbledhjes së Sindikatës së Artistëve të Skenës dhe Ekranit.
Duke folur para kolegëve të tij, Robert Ndrenika tregoi sesi hapësirat e Teatrit Kombëtar janë ngushtuar ndër vite nga kullat apo bizneset përreth. Më tej Ndrenika i është përgjigjur edhe ministres Mirela Kumbaro, duke e quajtur “ministresha” dhe e këshilloi ta përdorë godinën e Turbinës për takimet e fushatës elektorale, sepse për Teatër Kombëtar ajo sipas Ndrenikës nuk bënte.
“Para shumë viteve të kësaj demokracie, Teatri është vjedhur pjesërisht. Ajo Torre Drini, që është ngritur atje ka ardhur deri në rrëzë të skenës, siç e dini. Ajo duhet të mbante distancë 10 metra, a 7 metra a 12 metra. Pra kur të ndërtohet i ashtuquajturi Teatër, ne duhet të tërhiqemi sepse do t’i lëmë vend asaj, një vjedhje kjo. Ose dyqanet që janë mbrapa ato “Gjergji” kanë qenë pronë e teatrit. Gjatë këtyre viteve ata janë privatizuar.
Dhe tani kërkohet që këta privatë të bëjnë një kullë, apo kulla dhe në këto kulla pastaj, aneks të jetë edhe Teatri. Pra vazhdon një vjedhje sheshit, e hapur”.
