Reshjet me intensitet të lartë që kanë nisur gjatë natës dhe vijojnë ende kanë sjellë përmbytje në Qarkun Shkodër.
Në një deklaratë për mediat nga Oboti, prefektja e Qarkut Shkodër, Majlinda Angoni është shprehur se pavarësisht motit të keq, situata e krijuar është e menaxhueshme.
Prefektja bëri me dije se sa i takon shkarkimeve, vijojnë me 500 metër kub nga HEC-i i Vaut të Dejës, ndërsa shtoi se të gjitha shtabet e emergjencës janë në gatishmëri të plotë për çdo problematikë të krijuar.
“Siç ëshë paralajmëruar dhe nga IGJEUM dhe nga institucioni i prefektit, jemi në pikën kyçe alarmante që është pritur. Institucioni i prefektit për të gjithë bashkitë e prefekturës ka qenë nën monitorimin e situatës. Ishim dje në Obot, në Vaun e Dejës, në lumin Buna, në Drin, për të menaxhuar dhe për të monitoruar edhe prurjet nga kaskada e Drinit dhe për ta matur hap pas hapi. Kjo ditë e sotme ishte e pritshme sepse bëhet fjalë nga reshjet e prurjet e tyre. Jemi në një situatë shumë të menaxhueshme. Kemi vetëm 500 metër kub nga hidrocentrali i Vaut të Dejës, që derdhet është një gjë normale. Kemi një rritje të nivelit të Bunës dhe të liqenit të Shkodrës që ka sjellë këtë situatë. Jemi në pikën kyçe, them se jemi në menaxhim. Të gjitha shtabet e emergjencave në këto momente që flasim janë në gatishmëri të plotë”-tha Angoni.
Në Bashkinë Shkodër, sipërfaqja e përmbytur ka shkuar në 1000 hektarë.
