Përplasje mes Presidencës dhe Qeverisë. Kreu i shtetit i është përgjigjur një deklarate nga ministrja e Arsimit, për rikthimin në detyrë të rektorit të Universitetit të Tiranës, Mynyr Koni.
Nëpërmjet zëdhënësit, Presidenca thotë se në vendimin për të mos shkarkuar rektorin Kreu i shtetit ka folur me argumenta ligjorë. Sipas Presidentit, Ministria e Arsimit duhet të mbajë përgjegjësi për zbatimin e reformës në Arsimin e Lartë.
Më herët ministrja Besa Shahini në një deklaratë për mediat e ka quajtur vendimin e Metës si të pakonceptueshëm dhe qartazi në dëm të interesit publik. Për ministren e Arsimit, Meta ka dalë në mbrojtje të shkelësve të ligjit.
LEXO EDHE: Meta refuzoi shkarkimin e rektorit Koni, reagon ministrja e Arsimit
Reagimi
Presidenti i Republikës, Sh.T.Z Ilir Meta në dekretin e tij për rrëzimin e propozimit për shkarkimin e rektorit të Universitetit të Tiranës, z.Mynyr Koni ka folur me argumenta ligjorë më gjatë se kurdoherë tjetër.
Ministria e Arsimit duhet të mbajë përgjegjësinë e saj të plotë për zbatimin e Reformës në Arsimin e Lartë dhe nëse nuk është dakord me argumentat ligjorë të bëra publike nga Presidenti, të ndjekë procedurën që dikton ligji, përtej retorikave boshe.
Institucionet e Arsimit të Lartë janë autonome dhe askush nuk duhet të guxojë të prekë pavarësinë e tyre./ Opinion.al
