Më 15 Mars pritet që tryeza e përbashkët e partive politike të dalë me një draft përfundimtar në lidhje me Reformën Zgjedhore ku do të adresohen të gjitha rekomandimet e OSBE/ODIHR-it.
Një nga pikat e rëndësishme të kësaj reforme pritet të jetë reformimi i sistemit të financimit të partive politike. Në draftin e zbardhur në Partisë Demokratike, vihen re masa të forta që ata propozojnë kryesisht për burimet private të financimit.
Sipas propozimit të PD, “shuma që çdo person fizik ose juridik mund t’i japë një subjekti zgjedhor, duke përfshirë dhe kandidatët nuk mund të jetë më e madhe se 1 milion lekë ose kundërvlefta në sende ose shërbime”.
“Ndalohet dhënia e fondeve nga një person juridik apo çdo aksionar i tij si dhe personat e lidhur te tyre deri ne shkalle të trete, nëse ndodhet në një nga kushtet e mëposhtme:
a) ka përfituar fonde publike, kontrata publike apo koncesione në 4 vitet e fundit me vlerë mbi 10 milionë lekë.“Ky ndalim zbatohet edhe në rastin e nënkontraktimeve apo të kontratave te partneritetit publik privat.”;
b) ushtron veprimtari në fushën e medias;
c) ka qenë partner me fonde publike në projekte të ndryshme;
ç) ka detyrime monetare ndaj Buxhetit të Shtetit ose ndaj çdo institucioni publik. Ky detyrim nuk zbatohet nëse aksionari i zotëron këto aksione si rezultat i ofertës publike.”
Në draftin e tyre thuhet gjithashtu se financimet me burime private duhet të bëhen vetëm nga shtetas shqiptarë dhe shuma totale e financimit privat nuk mund të jetë më shumë se 50% e masës së financimit që partitë përfitojnë nga buxheti i shtetit.
Të dhënat për burimet financiare të partive, si dhe për shpenzimet e tyre duhet të publikohen kurdoherë. Komisioni Qendror i Zgjedhjeve është organi përgjegjës për monitorimin dhe mbikëqyrjen e financimit të partive, sipas rregullave të draftit të propozuar.
Një pikë tjetër që është risi për sistemin zgjedhor është se kontrolli i shpenzimeve financiare të partive mund të bëhet edhe nga partitë rivale dhe ekspertët e tyre mund të verifikojnë transaksionet financiare në bankat e nivelit të dytë përmes Drejtorisë së Përgjithshme të Parandalimit të Pastrimit të Parave.
Në rast se shkelja e regullave të financimit përbën vepër penale atëherë kjo duhet të sjellë pavlefshmëri dhe përfundim të parakohshëm nga KQZ të subjektit zgjedhor. /Opinion.al
Për të lexuar draftin e plotë të propozimeve të Partisë Demokratike KLIKO KËTU
