Kreu i grupit parlamentar të PS-së, Taulant Balla, të shtunën, reagoi menjëherë pas deklaratës së PD-së për mediat, se ai ka udhëtuar jashtë vendit 18 herë me charter me narkotrafikantin Edmond Bego.
Përmes një postimi në Facebook, Balla i bën thirrje kreut të PD-së të mos e shpërdorojë deputetin Salianji me shpifje, për udhëtime 18 herë me charter.
Ai tregon se informacioni për një fakt të tillë ndodhet në Albcontrol dhe është i aksesueshëm për të gjithë.
Deputeti socialist i kërkon PD arsyen se pse nuk bën një kallëzim në Prokurori, duke paralajmëruar padi në gjykatë për Ervin Salianjin.
Balla: Lulzim mjaft e shpërdorove Sali-anjin me shpifje, për udhëtime 18 herë me chartera?. Informacioni është në Albcontrol dhe mund ta merrni. Pse nuk bëni kallzim në Prokurori? Megjithatë faleminderit që po vijon te kontribosh për Fondin e Edukimit. Të hënën padia në gjykatë!
Partia Demokratike iu rikthye të shtunën akuzave për kreun e grupit parlamentar të PS-së, Taulant Balla, duke publikuar faktet sipas saj të lidhjes së ngushtë të tij me narkotrafikantin Edmong Bego.
Deputeti, Ervin Salianji, tha se Balla ka udhëtuar 25 herë me Edmond Begon, i dënuar në Itali për trafik ndërkombëtar droge. Udhëtimet sipas tij janë kryer me makine dhe avion.
Deputeti demokrat tha se është fakt se Balla gjatë historikut të udhëtimeve gjatë periudhës që qeveris Rama, ka përdorur plot 18 herë charter-in për udhëtime jashtë Shqipërisë, ku nuk mungojnë edhe udhëtime me charter nën shoqërinë e trafikantit të drogës Edmond Begos.
Salianji deklaroi se nuk ka departament e prokurori që të mbulojë lidhjet e PS me krimin e organizuar.
Për kreun e grupit paralamentar të PS-së, kjo është një shpifje, ndërsa të hënën paralajmëron se padia do të jetë në gjykatë.
