Ministri i Brendshëm, Fatmir Xhafaj foli për herë të parë mbëmjen e djeshme në emisionin “Studio e Hapur” për ekstradimin e Nezar Seitajt, personit që kërkohej nga drejtësia italiane për dosjen Habilaj, por njëkohësisht hetohej edhe nga Prokuroria Shqiptare e Krimeve të Rënda për të njëjtën akuzë “trafik droge”. Sipas ligjeve në fuqi ai nuk duhet të ekstradohej përsa kohë po heton drejtësia jonë, por për rastin në fjalë u bë një sy qorr dhe një vesh shurdh. Edhe për ministrin e Brendshëm, Fatmir Xhafaj, faji i mbetet Krimeve të Rënda.
I pyetur nëse ai vetë do të firmoste ekstradimin e Seitajt, Xhafaj tha: Po të mos kisha dijeni se ka pasur hetim, PO. Policia e ka ndaluar si person nën hetim, pa pasur një mandat arresti për personin në fjalë. I ka kërkuar policia palës italiane që ai person ka qenë në kërkim ndërkombëtar, dhe në asnjë rast në Interpol Tirana nuk rezulton një dokument që provon se ky person është me vendim arresti nga prokuroria shqiptare. Policia e ka identifikuar e para, pa asnjë kërkesë të prokurorit”.
Në vijim të këtij argumenti, ministri shprehet: “Çfarë mendoj unë për Prokurorinë e Krimeve të Rënda, ua kam thënë në sy, e kam thënë dhe publikisht. Policia ka njoftuar Prokurorinë se kur do kalonte në Rinas, sipas njoftimit të Interpol Romës. Në kërkim (TIMS) dalin ata që janë në kërkim ndërkombëtar”.
“Ai u ekstradua, por nëse ka pasur edhe hetim kombëtar edhe mandat arresti ndërkombëtar, prokuroria mban përgjegjësi”, deklaroi ministri i Brendshëm.
Sakaq në këtë ping-pong janë përfshirë një sërë institucionesh, mes tyre Ministria e Drejtësisë që firmosi ekstradimin. Ajo thotë se i është referuar vendimit të Gjykatës së Shkallës së Parë në Tiranë, të datës 29.12.2017, duke vendosur miratimin e kërkesës së Prokurorisë së Rrethit Gjyqësor Tiranë për lejimin e ekstradimit të shtetasit Nezar Seiti.
“Ministria e Drejtësisë nuk ka patur asnjë informacion apo akt tjetër procedurial nga Prokuroria e Përgjithshme si dhe nga gjykata mbi ekzistencën e ndonjë pengese të mundshme ligjore për ekstradimin e shtetasit Nezar Seiti, në zbatim të parashikimeve ligjore të nenit 499 të Kodit të Procedurës penale, ka dhënë miratimin për ekstradim”, thuhet në deklaratë.
Nga ana tjetër është prokuroria e Përgjithshme e cila thotë se as ajo nuk ka patur dijeni se Seitaj po hetohej nga Krimet e Rënda dhe për këtë ka kërkuar që të kryhen hetime nga prokuroria e Durrësit.
“Prokuroria e Përgjithshme, Drejtoria e Marrëdhënieve Juridiksionale me Jashtë, nuk ka patur asnjë informacion në lidhje më procedimin penal ndaj shtetasit Nazer Seitaj nga Prokuroria Për Krime të Rënda. Aktet e vetme që ka disponuar kjo drejtori janë aktet që kanë lidhje me procedurat e ekstradimit të shtetasit Nazer Seitaj, në funksion të drejtësisë italiane”, thuhet në deklaratë.
“Nuk ka pasur asnjë komunikim të Prokurorisë Tiranë me Prokurorinë Për Krime të Rënda në lidhje me çështjen. Nga shqyrtimi i akteve të Prokurorisë për Krime të Rënda, rezulton: se në funksion të procedimit penal nr.134/2016, më datë 19.10.2017 ka urdhëruar ndalimin e shtetasit Nazer Seitaj, i ditëlindjes 30.03.1977, lindur dhe banues në Vlorë, i dyshuar për veprën penale të “Trafikimit të narkotikëve”, formë e posaçme të grupit të strukturuar kriminal.
Ndalimi i shtetasit Nazer Seitaj është vlerësuar i ligjshëm nga Gjykata për Krime të Rënda dhe ndaj tij është caktuar masa e sigurimit “arrest në burg” me afat 20 ditë dhe në përfundim të këtij afati është caktuar masa e sigurimit “arrest në burg”.
Kjo prokurori nuk ka asnjë komunikim në lidhje më çështjen as me Prokurorinë e Tiranës dhe as me Prokurorinë e Përgjithshme.
Vendimet e Gjykatës së Shkallës së Parë për Krime të Rënda, për vlerësimin e ndalimit dhe caktimin e masës së sigurimit i janë dërguar për zbatim Drejtorisë së Përgjithshme të Burgjeve.
Pra gjithë kjo histori e mbushur me shkelje, sipas kryeprokurores Arta Marku pritet të zbardhet nga Prokuroria e Durrësit.
Sakaq, opozita ka deklaruar hapur se Seitaj u ekstradua për të penguar hetimet për Saimir Tahirin. Kujtojmë se nga dosja voluminoze e prokurorisë së Katanias ka dalë emri i ish- ministrit të Brendshëm, i cili është i vetmi që po hetohet në Shqipëri, të gjithë të tjerët tashmë janë duke u hetuar në Itali.
/Opinion.al
