Kryeministri Rama deklaroi nga foltorja e Kuvendit se vendimi i Kuvendit për emërimin e dy anëtarëve të Gjykatës Kushtetuese dhe marrjen të mirëqenë të emërimit automatikisht të Arta Vorpsit ka qenë i konsultuar me SHBA dhe BE-në.
Në seancën e jashtëzakonshme për legjitimitetin e dekretit të presidentit për emërimin e Marsela Xhaferllarit si anëtare të Gjykatës Kushtetuese, Rama tha se Meta e ka problemin me drejtësinë dhe se e ka vënë vendin në një pozitë të turpshme para partnerëve strategjikë duke i akuzuar si të korruptuar.
“Histori e zakonshme me Ilir Metën. Përplasja është mes Ilir Metës dhe drejtësisë. Edhe njëherë tjetër për këdo që do të kuptojë pa hyrë në të thella jemi përballë si Kuvend i Shqipërisë me njeriun që ka humbur busullën dhe e ka kthyer presidencën në një frëngji ku sulmon nga të 4 anët duke qenë ne këtu jemi 100% jo 99% në të njëjtën linjë me SHBA dhe BE dhe pastaj është e lehtë të kuptohet se cdo herë tjetër Meta nuk kursen as aleatët strategjikë duke na vënë të gjithëve në një pozitë jo komode dhe të turpshme për ta thënë me të gjitha fjalët deri në fund sepse insinuon haptaz se këto përfaqësi, që janë qysh në ditën e parë të procesit të reformës në drejtësi, akuzohen si të korruptuara. Nuk ka më turp dhe pas kësaj nuk ka më nevojë të zgjatemi për arsyet që na sjellin këtu.
Nuk do merrem me Ilir Meten por me drejtësinë e cila është në ardhje. Përpara se të vendosnim të bënim atë që Kuvendi bëri, pra zgjedhjen e dy anëtarëve të GJK, ne jemi dakordësuar 100% me aleatët strategjikë. Për ata që duan të dinë të vërtetën kam një pyetje. A është e mundur që SHBA dhe BE ti jenë vënë në dispozicion një projekti tjetër përveç se çlirimit të drejtësisë shqiptare dhe bërjen e saj funksionale” tha Rama. /Opinion.al
