Kryeministri Rama ka mbajtur sot fjalën e tij në një konferencë të organizuar nga Këshilli i Bashkëpunimit Rajonal (RCC) dhe Forumi Ekonomik Botëror (WEF- Davos) për përshpejtimin e konkurrencës dhe inovacionit në Ballkanin Perëndimor.
Ndër të tjera në fjalën e tij Rama vlerësoi rolin e PPP-ve të cilat sipas tij na mbështesin fuqishëm duke na çuar përpara për iniciativa.
“Unë e di që nëse do të thoja PPP unë menjëherë do të kem shumë njerëz që do fillojnë të bëjnë zhurmë, për hir të luftërave ose analizave, që do të bëhen dhe asnjëherë nuk kanë treguar vullnet për të kuptuar sesa e rëndësishme është që t’i kemi PPP si pjesë e përpjekjes tonë të përgjithshme. PPP janë ato që do të na mbështesin fuqishëm të gjithë ne, në identifikimin dhe duke na shtyrë më tej përpara për iniciativa, të cilat do të krijojnë kushte të reja dhe iniciativa të reja për start up-e”, tha Rama.
Por pothuajse në të njëjtën kohë me kryeministrin ka qenë duke mbajtur fjalën e tij ish-kryeministri Berisha në konferencën “Sfida dhe vizione në shëndetësi” të organizuar nga PD në bashkëpunim me fondacionin “Konrad Adenauer”. Berisha u ndal gjithashtu tek Partneritetet Publik Privat, konkretisht tek ata në shëndetësi.
“Ndër të gjitha personazhet e letërsisë botërore, njëri është më i veçanti dhe ky është ‘Rreshteri Tenardie’, personazh tek “Të mjerët” e Viktor Hygoit, i cili vidhte të plagosurit dhe të vdekurit në fushë betejë. E vërteta është se sot skenat e fushë betejës përsëriten nga dyshja Edvin Kristaq Hajduti dhe ndrikulla e tij që drejton shëndetësinë. Të pangopur këta vjedhin si lukuni, cdo ditë medikamentet e vaksina jetike për shëndetin e qytetarëve. Këta shpikën check up-et e koncesionet, duke vjedhur të sëmurët shqiptarë. Jo më larg se dje, po deklaronte në një nga sallat se nuk kemi mungesë mjekësh, ky cinik injorant, nuk kupton se sot në mjek për frymë Shqipëria është më keq së në kohën e Enver Hoxhës. Numri i mjekëve për frymë është një nga treguesit themelorë të një sistemi shëndetësor, por atij ia kanë mbyll sytë koncesionet. Shqipëria po shkon në një mjek për 1200 banorë.”, tha Berisha.
Një nga PPP-të më të përfolura në mjekësi është ai i sterilizimit të pajisjeve mjekësore. Për atë ka një kallëzim penal në SPAK ku akuzohen disa zyrtarë përfshi ish-ministrin e Shëndetësisë, Ilir Beqja për shpërdorim detyre dhe fondesh. /Opinion.al
