Kryeministri Edi Rama ka vizituar ditën e sotme, fshatin Obot, i cili është një nga zonat më të prekura nga përmbytjet në Shkodër.
Gjatë vizitës ai tha se kjo zonë ka qenë gjithmonë problematike, teksa theksoi se është i shqetësuar pasi reshjet intensive do të vijojnë në këtë zonë sipas parashikimeve.
Rama bëri të ditur se pavarësisht situatës nuk ka kosto në bagëti dhe se ushtria u ka ardhur në ndihmë njerëzve të prekur të kësaj zone me 400 pako ndihma ushqimore që kanë shkuar në familjet që kanë pasur probleme.
“Jemi në një situatë që mund ta konsiderojmë në kontroll duke përjashtuar zonën e Obotit që gjithmonë ka qenë problematike dhe e paevitueshme. Ajo që më shqetëson është se reshjet intensive do të vijojnë në këtë zonë sipas parashikimeve. Nga ana e kaskadës nuk ka shkarkime që përkeqësojnë përmbytjet në zonë, nuk ka banesa të dëmtuara, s’ka bagëti të dëmtuar dhe lëvizshmëria ka qenë e garantuar. Aty ku kemi bllokime do të fusim forca shtesë me ushtri e mjete lundrimi që t’u përgjigjemi të gjitha kërkesa edhe nevojat. Janë rreth 400 pako që kanë shkuar në familjet që kanë pasur problematikë. Do të vazhdojmë sigurinë që askush të mos ketë probleme në raste emergjence, po ashtu do të sigurohen ndihma. Besoj që 24 orët që kemi përpara janë më problematike”, tha Rama.
Më tej, Rama theksoi se situata vijon të jetë në kontroll dhe se dëmet e shkaktuara nga përmbytjet janë minimale.
“Orët e ardhshme priten të ketë reshje shumë intensive në zonën e Shkodrës, që krejt ndryshe nga përmbytja e frikshme e janarit 2010, kur me më pak reshje se këtë herë u evakuuan nga banesat mbi 10 mijë njerëz e mijëra krerë bagëti dhe qyteti u bllokua plotësisht nga uji, si rezultat i menaxhimit kriminal të kaskadës së Drinit e i bllokimit total të kanaleve kulluese.
Sot situata vazhdon të jetë nën kontroll dhe dëmet janë minimale, pikërisht sepse është punuar vitet e fundit me zhbllokimin e kanaleve kulluese si edhe menaxhimi i kaskadës po bëhet me profesionalizëm të lartë”, shprehet Rama. /Opinion.al
