Kryeministri Edi Rama në takimin me banorët e Beratit ka dhënë edhe disa mesazhe politike, edhe pse në formën e batutave. Rama u bëri thirrje qytetarëve që të mos shkonin pas opozitës, por të merren me punët e përditshmërisë për të siguruar ekonominë e familjeve, ndërsa tha aksionin e opozitës po e drejton Monika Kryemadhi.
“Mbajini burrat këtu, mos shkojnë mbas berihajit, se sebep duan rrinë që rrinë në kafe, thonë hajde të shohim se çfarë bëhet andeja nga Tirana. Asgjë nuk bëhet, kështu që mbajini për krahu. Burrat socialistë bëjnë punë, se burrat demokratë nuk bëjnë asgjë. Edhe këtë që po bëjnë, është punë, por është punë se prapthi. Edhe atë e bën Monika madje, se të ishte për Lulin flinte gjumë deri në vitin 2021”, u shpreh Rama.
Ai gjithashtu tha se nga protestat e opozitës qeverisë nuk i preket asnjë fije floku dhe se Partia Socialiste do të hyjë në zgjedhjet lokale, për të marrë edhe bashkitë që administrohen aktualisht nga opozita.
“Ata thonë se s’do hymë në zgjedhje. E çfarë problemi ka? Ne i kemi ndarë gjërat, Luli me Monikën, Monika me Lulin, ne me njerëzit, njerëzit me ne. Përveç zgjedhjeve, kanë hallin tjetër se po krijohen institucionet e asaj drejtësie që u munduan ta pengojnë që në ditën e parë. Jemi mu në zemër të gjithë organizmit elektoral që lidhet me LSI-në. Tani më thoni ju mua, a e mban dot Shpiragu në kurriz klithmën e Monikës “O Zot, mbroji shqiptarët nga blerja e votës”, a mundet Shpiragu ta mbajë dot, se mendja e njeriut nuk e mban!”, tha Rama./Opinion.al
