Kryeministri Edi Rama ka reaguar për ndarjen nga jeta të aktorit Guljelm Radoja si pasojë e COVID-19. Rama ka postuar në rrjetet sociale një foto të aktorit, krahas së cilës shkruan; “Lamtumirë i dashur mik”.
Kryetari i Kuvendit, Gramoz Ruçi ka shprehur ngushëllime e tij për ndarjen nga jeta të Radojës.
Ruçi thotë se se emri, vepra dhe rolet e Radojës nuk do të humbasin asnjëherë nga kujtesa e shqiptarëve.
“Me trishtim mora lajmin mbi ndarjen nga jeta të artistit Gulielm Radoja. Aktori i mirënjohur dhe njeriu i mirë Radoja nuk e fitoi betejën me sëmundjen. Familja humbi njeriun e dashur dhe Shqipëria një artist të shquar. Por emri, vepra dhe rolet e tij nuk do të humbasin asnjëherë nga kujtesa e shqiptarëve. Do ta kujtojmë gjithmonë për kontributin e tij të spikatur si aktor dhe regjisor pranë Teatrit “Bylis” të Fierit dhe si aktor në Teatrin “Aleksandër Mojsiu” të Durrësit, si edhe për mbi tridhjetë rolet në filmat shqiptarë nga më të dashurit për publikun”,- shkruan Ruçi.
Edhe Presidenti Ilir Meta shpreh ngushëllimet për familjen Radoja, teksa vlerëson punën e aktori shqiptar në rolet në filma përgjatë viteve.
“Me pikëllim të thellë mora lajmin trishtues për ndarjen nga jeta të një prej ikonave të kinematografisë dhe skenës shqiptare, artistit të madh Guljelm Radoja, i cili me veprën e Tij la gjurmë të përhershme në trashëgiminë tonë artistike, kulturën kombëtare dhe kujtesën shpirtërore të shqiptarëve. Falë interpretimit virtuoz, talentit dhe mjeshtërisë së rrallë artistike, Guljelm Radoja u dha përjetësinë personazheve të tij, duke e lartësuar dhe e përfaqësuar denjësisht artin shqiptar, aq sa me të drejtë mund të thuhet se kinematografia shqiptare humbi sot “Petro Nini Luarasin” e saj, që aq mjeshtërisht ai e solli në filmin “Kush vdes në këmbë”. Ashtu sikundër do të jenë të paharruara për të gjithë ne edhe dhjetëra personazhet e interpretuara prej Tij për shumë dekada. Ngushëllimet më të ndjera për familjen Radoja dhe komunitetin e dashur të artistëve për këtë humbje të madhe e të pazëvendësueshme. Lamtumirë miku ynë i dashur!”-shpreht Meta./Opinion.al
