Kryeministri Edi Rama ka kritikuar krerët e bashkive të vendit,pasi sipas tij, ata nuk gjenerojnë të ardhura.
Rama u shpreh se bashkitë i kanë mundësitë për të gjeneruar të ardhura dhe të fitojnë para për buxhetin e tyre. Ai tha se nuk është e mundur që qeveria të përgjigjet për çdo kërkesë apo nevojë.
“Rritja e performancës së bashkive është një prioritet për ne, të gjithë së bashku. Bashkitë të mendojnë për të shtuar burimet e tyre financiare me të ardhura që burojnë nga tregu. Është e dhëna më dramatike në këto 30 vite që volume i aktiviteteve që lidh bashkitë me krijimin e të ardhurave jo buxhetore është minimal, afër zeros. Është e pamundur që ne ende sot në nivel bashkiak, që nga Tirana, të mos kemi asnjë aktivitet ekonomik të pavarur që prodhon të ardhura. Duke filluar nga ndërtimi. Bashkitë i kanë të gjithë mundësitë që të ndërtojnë dhe të fitojnë para për buxhetin e tyre. Më thoni një kompani bashkiake që ndërton në funksion të strehimit në Shqipëri? Asnjë, nuk ka! Nuk mundet të jetë qeveria përgjigja për çdo kërkesë dhe nevojë”,-tha Rama.
