Gjatë gjithë fushatave elektorale që nga viti 2013, Kryeministri Rama ka ripërsëritur në çdo takim elektoral retorikën me doza të larta feminizmi se gratë janë më të zgjuara, më punëtore dhe më të afta se burrat.
Të njëjtës retorikë ai ka dashur ti kthehet edhe në mitingjet elektorale të zgjedhjeve vendore të këtij viti. Por kësaj radhe jo duke i diferencuar burrat nga gratë në terma kualitative por duke i bërë një diferencim tjetër.
Kryeministri tha se çdo grua që punon në bashkitë që tani drejtohen nga opozita nuk do hiqet nga puna kur drejtimi ti kalojnë Partisë Socialiste. Ndërsa burrat, që ta ruajnë vendin e punës nuk duhet të dalin në protestat e opozitës. Madje ata që dalin dhe bëjnë krime zgjedhore do hyjnë në burg ose nuk do të punojnë më kurrë në administratën shtetërore.
“Ne do ti marrim të gjitha bashkitë. Në asnjë nga bashkitë që ne sot nuk drejtojmë nuk do të largohet nga puna asnjë grua dhe asnjë vajzë. Do vazhdojnë të punojnë atje dhe s’duhet ta kenë fare problem se do shkojmë ne atje e do i nxjerrim nga puna. Asnjë vajzë dhe asnjë grua nuk do të preket në të drejtën për të vazhduar të punojë. Burrat tani si ta duan. Duan të dalin dhe të shkojnë pas berihajt, le ta provojnë, le ta provojnë. Jo që duke shkel ligjin do përfundojnë burgjeve, por edhe sikur të mos përfundojnë burgjeve nuk kanë për të shkelur më kurrë në administratën e shtetit se i kap dekriminalizimi” tha Rama në fjalën e tij në Gjirokastër.
Ky premtim, përveçse arbitrar është dhe logjikë të kundërt me ligjin për administratën publike. Punonjësit e administratës që pretendohet të jenë të mbrojtur nga statusi i nënpunësit civil, nuk mund të ndahen sipas gjinisë dhe gjithashtu vendi i tyre i punës nuk mund të varet nga pjesëmarrja ose jo në tubime.
Kryeministri duket se ka marrë shkasë nga prezenca pothuajse 100% meshkuj në tensionet e krijuara në disa KZAZ të bashkive ku drejton opozita. Megjithatë ai nuk cilësoi për femrat çfarë ndodh nëse ato vendosin të marrin pjesë në tubimet e opozitës në 30 qershor. A do t’ja garantojë edhe atëherë ai vendin e punës? /Opinion.al
