Kryetarja e LSI-së, Monika Kryemadhi sulmoi ashpër kryeministrin Edi Rama për padinë që ky i fundit bëri ndaj Ramush Haradinajt.
Në fjalën e saj gjatë aktivitetit të LSI në Korçë, Kryemadhi tha se padia e Ramës ndaj Haradinajt është bërë për hakmarrje dhe shtoi se ajo është dorëzuar ditën e Masakrës së Reçakut.
“Edi Rama ka zgjedhur t’i tradhtojë interesat e shqiptarëve. Edi Rama ka zgjedhur të tradhtojë Shqipërinë por të tradhtojë Kosovën.
Pasi dështoi në tentativën e tij të zezë për copëtimin e Kosovës, për llogari të ëndrrës së Serbisë së Madhe, ai po bën çmos të hakmerret ndaj atij që iu bë barrikadë e pakalueshme, fortesë e pa marrshme, digë e pa depërtueshme e ujërave që do përmbytnin ardhmërinë e shtetit të Kosovës, ndaj Komandantit të UÇK dhe Kryeministrit të Kosovës, heroit të gjallë të Kombit shqiptar,zotit Ramush Hajradinaj.
Padia e tij groteske, armiqësore nuk ka për qëllim vetëm Ramushin si individ, por përçarjen e Unitetit Kombëtar. Me këtë padi të zezë Edi Rama do të njollosë, jo Ramushin, por luftën për çlirimin e Kosovës, gjakun e të rënëve dhe viktimave të pastrimit etnik serb.
Ky njeri fasadë, pa asnjë ndjenjë kombëtare apo qoftë edhe qytetarie, pikërisht për t’i ardhur në ndihmë tezës serbe të mohimit të masakrës së Reçakut, gjeti pikërisht atë ditë të çonte padinë e tij sa qesharake aq monstruoze ndaj Ramush Hajradinajt.
Sot më shumë se asnjëherë më parë shqiptarët, në të dyja shtetet, janë shumë të qartë për atë që është Edi Rama dhe se çfarë interesash dhe qëllimesh të errëta ai përfaqëson.
Unë jam e bindur që Ramush Hajradinaj përballë këtij sharlatani antikombëtar nuk ka nevojë për mbrojtjen tonë, se është lufta dhe shërbimet e tij ndaj shtetit të Kosovës, lirisë së saj, gjaku i derdhur për kombin shqiptar, që bëjnë diferencën e madhe, të pakrahasueshme midis të dyve. Por si shqiptare, si politikane e ndjej për detyrë të jem krah Ramushit dhe përballë anti shqiptarit Edi Rama.” u shpreh Kryemadhi. /Opinion.al
