Akuzave të kryetarit të PD-së për vjedhje me fondet e rindërtimit, kryeministri Rama iu përgjigj duke i thënë të bëhet burrë pasi nuk del dot nga zyra që të takojë anëtarët e Partisë Demokratike.
“Kanti thotë kur dikush të akuzon për diçka që nuk e ke bërë, ose e ka bërë vetë, ose do ta bënte vetë po të ishte në vendin tënd. Kur je përballë akuzave të tilla është barra e akuzuesit që të provojë akuzën. Zotëria më dha një mundësi, për shkak të paaftësisë së tij proverbiale në raport me shifrat. Po sikur fondet e dhëna nga BE në raport me fondet e dhena nga qeveria për shkollat të jenë më të larta se ato të qeverisë.
Po sikur investimet e bëra nga qeveria shqiptare, të jenë më të ulëta se ato të BE-së për të njëjtat standarde dhe kritere, çfarë i mbetet parafolësit? I mbetet ajo që i ka mbetur gjithmonë, humbja, ajo që i ka mbetur që në ditën e parë, humbja që e përgatit me duart dhe me qëndrimet e veta çdo ditë.
Mua fondet e BE Lulzim më pëlqejnë shumë, u jam mirënjohës të gjithë atyre që na kanë ndihmuar në këtë proces, që kanë marrë përsipër që të investojnë drejpërdrejt në këtë projekt. Fjalën hajdut gëlltite brenda, bëj një kthesë me gjuhën në drejtim të ezofagut, mate mirë kur flet për radhë të afërmish që merren me ndarjen e lekëve, duke shfrytëzur zyrën e kryetarit të bashkisë. Bëhu burrë njëherë që të ka ardhur rasti.
Ti nuk del dot nga zyra që të takosh anëtarët e partisë tënde, dhe më tregon mua ti se çfarë është që të jesh pranë njerëzve, mos hajde këtu të bësh leksione morali, dhe të ndrysh shtëpitë e shqiptarëve, se nuk ta ka njeri borxh Lulzim. Unë jam këtu për të respektuar këtë institucion, për të respektuar edhe ty bashkë me partinë tënde. Partinë më të bukur të lindjes? Bëhu burrë dhe mos hajde këtu me dëngla dhe akuza, po hajde këtu me argumente”, tha Rama.
