Edhe nga Maliqi, në takimin elektoral, kryeministri Edi Rama ka akuzuar sërish presidentin Ilir Meta dhe liderët e opozitës se duan të pengojnë Shqipërinë të çel negociatat me BE-në.
Sipas Ramës, nga Ilir Meta, Sali Berisha, Lulzim Basha dhe Monika Kryemadhi gjithçka bëjnë, e bëjnë për të penguar negociatat që më pas do të kërkonin një hap më përpara për reformën në drejtësi.
“Sot kanë ikur nga Parlamenti, kanë ikur nga zgjedhjet për të penguar Shqipërinë. Sepse vettingun nuk e pengojnë dot, vazhdon dhe ka nxjerrë nga pallati i drejtësisë gjithë ata që me marrëveshje me politikanët kanë mbajtur peng drejtësinë. Arsyeja pse ata sot janë rrugëve dhe kërcënojnë përditë, thuajse se kanë dalë nga çdo kontroll i vetvetes, ata e dinë shumë mirë se nëse çelen negociatat bisedimet fillojnë më dy kapitujt e drejtësisë ku BE nuk do kërkojë më çfarë është shkruar në letër, por do fillojë të kërkojë prova. Prova që ky sistem drejtësie funksionon dhe që në Shqipëri ka një drejtësi ku askush nuk mund të shpëtojë në rast se përballet me ligjin. Drejtësia mund të ndëshkojë, presidentë, ish presidentë, kryeministra e ish kryeministra, ministra e ish-ministra si këdo që ka shkelur ligjin. Në këto kushte e kuptoni shumë mirë pse Saliu, Ilir, Lulzimi e Monika janë vendosmërisht kundër, janë vendosmërisht në kundërshtim me interesin e këtij vendi dhe këtij populli dhe duan të marrin peng Shqipërinë”, tha Rama.
Kryeministri tha se nëse do të pranonte shtyrjen e zgjedhjeve do të krijohej një precedent i rrezikshëm. Sipas tij opozita nuk kërkon shtyrjen e zgjedhjeve, por qëllimi i tyre është të marrin peng zgjedhjet./ Opinion.al
