Bota

Qindra varre gjenden në qytetin e çliruar të Izyum në Ukrainë



Bëhu pjesë e Grupit Zyrtar të Opinion.al
>> KËTU <<
               Publikuar në : 18:21 - 16/09/22 |
Opi Nion

Ukraina njoftoi se qindra varre janë gjetur jashtë qytetit të Izyum, disa ditë pasi u rimor nga Rusia.

BBC shkruan se forcat ukrainase në një pyllë jashtë qytetit zbuluan kryqe druri, shumica e të cilëve ishin shënuar me numra. Ndërkohë, autoritetet ukrainase thanë se disa prej varreve do të zhvarroseshin ditën e premte.

Ende nuk është e qartë se çfarë ka ndodhur me viktimat, por të dhënat e hershme tregojnë se disa mund të kënë vdekur nga bombardimet dhe mungesa e eksesit në kujdesin shëndetësor. Sakaq, kreu i shërbimit policor kombëtar të Ukrainës këtë të premten tha se shumica e trupave i përkisnin civilëve.

Më herët, autoritetet ukrainase i thanë BBC-së se më shumë se 400 trupa mendohej se ishin varrosur në vend.

Mykhailo Podolyak, një këshilltar i lartë i presidentit ukrainas Volodymyr Zelensky, se shumë vende varrimesh masive ishin zbuluar në disa zona të çliruara.

“Ne pamë shumë vende ku njerëzit u torturuan. Ne pamë njerëz të frikësuar që mbaheshin pa dritë, pa ushqim, pa ujë dhe pa të drejtë drejtësie. Sepse aty nuk kishte autoritet, kishte vetëm njerëz me armë”, tha Podolyak.

Në lidhje me situatën, OKB thotë se shpreson të dërgojë një ekip monitorimi në qytet në ditët në vijim.

Një zëdhënës i zyrës për të drejtat e njeriut tha se do të përpiqet të zbulojë nëse ata që vdiqën ishin civilë apo personel ushtarak, dhe se do zbulojnë shkakun e vdekjeve.

Izyum, i pushtuar në ditët e para të luftës, u përdor nga Rusia si një qendër kryesore ushtarake për të furnizuar forcat e saj nga lindja.

Në fjalimin e tij të natës, Presidenti Volodymyr Zelensky tha: “Ne duam që bota të dijë se çfarë po ndodh realisht dhe në çfarë ka sjellë pushtimi rus. Bucha, Mariupol, tani, për fat të keq, Izyum… Rusia ka lënë vdekje kudo. Dhe duhet të mbahet përgjegjës për këtë.”

Udhëheqësi ukrainas po i referohej varreve masive të gjetura këtë pranverë në Bucha, pranë kryeqytetit Kiev, dhe gjithashtu pranë Mariupolit, porti kryesor juglindor i Ukrainës i pushtuar tani nga trupat ruse.

Pjesa më e madhe e Izyum-it shtrihet në rrënoja. Një politikan vendas u tha gazetarëve se deri në 80% e infrastrukturës së qytetit është shkatërruar dhe trupat janë ende duke u zbuluar në rrënoja.

Izyum dhe një numër qytetesh të tjera në rajonin e Kharkiv u çliruan në fillim të këtij muaji gjatë një kundërofensive të shpejtë ukrainase që dukej se kishte befasuar trupat ruse dhe i la të papërgatitur për të mbrojtur pozicionet e tyre.

Ukraina thotë se ka identifikuar më shumë se 21,000 krime të mundshme lufte, duke përfshirë vrasjen e civilëve dhe përdhunimin të kryera nga trupat ruse që kur Presidenti Vladimir Putin urdhëroi pushtim të plotë të vendit më 24 shkurt.

Hetuesit dhe gazetarët gjetën atë që dukej të ishte provë e vrasjes së qëllimshme të civilëve në Bucha dhe zona të tjera aty pranë. Gjykata Ndërkombëtare Penale ka dërguar tashmë një ekip hetuesish dhe ekspertësh të mjekësisë ligjore në Ukrainë për të hetuar këtë.

Nga ana tjetër, qeveria ruse ka mohuar vazhdimisht se ka shënjestruar civilët./Opinion.al

Pas