Kryetarja e Lëvizjes Socialiste për Integrim, Monika Kryemadhi, ka sjellë edhe një herë në kujtesë aferën e inceneratorëve.
Përmes një video të publikuar në rrjetin social “Facebook”, Kryemadhi denoncon zinxhirin e bashkëpunimit të shtetit shqiptar në këtë aferë.
Sipas saj, të përfshirë në aferën e inceneratorëve është edhe kryebashkiaku i Tiranës, Erion Veliaj.
Ajo shton pyetjen se përse SPAK nuk po vepron ndaj Veliajt? Ky reagim i saj vjen pasi disa ditë më parë SPAK arrestoi edhe ish-ministrin e LSI, Lefter Kokën për aferën e inceneratorëve.
“Vazhdojmë me serinë e denoncimit publik të mega aferës së inceneratorëve. Më poshtë do të shihni vetëm një pjesë të zinxhirit të bashkëpunimit kriminal të gjithë shtetit shqiptar, në këtë aferë dhe konkretisht rolin e kryetarit të bashkisë Tiranë. Pyetja shtrohet: Erion Veliaj do të përballet me drejtësinë në detyrë si kryetar bashkie, apo si i shkarkuar nga Rama?”,-shkruan Kryemadhi./Opinion.al
