Zv/kryeministri Erion Braçe i ftuar në “Abcnews” është shprehur se qeveria e PS nuk po shkon drejt një regjimi. Por kjo parti qeverisë e vetme, pasi sipas tij, kjo ka qenë zgjedhja e popullit në vitin 2017.
Braçe tha se PS po shkon në zgjedhje me të tjerë garues, pasi PD dhe aleatët e saj kanë deklaruar bojkotimin e tyre.
“Ne jemi në qeveri pa aleatë sepse kështu vendosën shqiptarët në 2017. Për sa kohë njerëzit votuan që ne të qeverisim të vetëm, padiskutim që ne nuk i themi njerëzve JO. Ne njerëzve do u themi PO. Ne nuk kemi kërkuar të fitojmë 61 bashki, ne thamë që po shkojmë në një palë zgjedhje me kundërshtarë ata që kemi, madje të ashpër dhe të përgatitur. Gjatë gjithë kësaj kohe zoti Basha fushatë ka bërë por në momentin që vendosin të tërhiqen nga gara zgjedhore, kjo nuk është më përgjegjësia jonë, përgjegjësi e jona është standardi i zgjedhjeve”, tha Braçe.
Në këtë mënyrë, zv/kryeministri i është përgjigjur dhe ministrit për Diasporën, Pandeli Majko, i cili deklaroi në Kuvend se mungesa e opozitës në zgjedhje do ta degradojë vendin në regjim.
“Shqipëria rrezon të bjerë në informalitet legal në mungesë të zgjedhjeve, teknikisht zgjedhjet pa opozitën nuk mund të konsiderohen normale dhe ne rrezikojmë degradim në regjim. Kjo situatë nuk është produkt, por pasojë e vendimeve të opozitës jashtë Kuvendit. Ajo e vlerësoi bojkotin si mekanizëm për të shkuar në zgjedhjet e përgjithshëm të parakohshme. Kriza aktuale është pasojë e një politike opozitare që vepron sipas parimit të gjitha ose asgjë. Ky është gabimi i rëndë. Partia Socialiste duhet të negociojë krizën edhe me trupën parlamentare që ka hyrë në Kuvend nga listat zëvendësuese të opozitës, çdo vendim duhet të kalojë nga votimi në Kuvendin e Shqipërisë. Sot politika në mungesë të Gjykatës Kushtetues nuk ka mundësi legale të negociojë afatet e Kushtetutës së republikës së Shqipërisë për zgjedhjet, por ky Kuvend ka të drejtë të ndryshojë Kushtetutën bazuar mbi këtë eksperiment negative që po ndodh. Grupi i opozitës në Kuvend duhet respektuar për propozimet për ndryshimin e sistemit elektoral, pavarësisht se me deputetë të rinj, ata kanë të drejtë t’i japin historisë së këtij Kuvendi, vendimin dhe vlerësimin publik për to. Dekreti i Presidentit duhet regjistruar si një akt jo kushtetutës dhe jam dakord me propozimin e këtij qëllimi. Presidenti ka gabuar dhe ka krijuar një problem. Ilir Meta është zgjedhur President nga Partia Socialiste, ai është produkti ynë.”, theksoi Majko./ Opinion.al E.Xh.
