Ka nisur pikërisht nga Elbasani prezantimi i platformës së re elektorale të Partisë Socialiste. Në mesin e akuzave për korrupsion për kontratat e inceneratorëve, kryeministri Rama ka zgjedhur pikërisht sheshin përpara inceneratorit të Elbasanit për të folur rreth platformës “Deputeti që duam”.
“Ne po promovojmë platformën e thirrjeve të hapura, për vajzat e djemtë, gratë e burrat që kanë pasionin, vullnetin dhe kurajon për të hyrë bashkë me ne në përpjekjen për ta dërguar më tej Shqipërinë, përbën një hap të guximshëm në jetën e brendshme të Partisë Socialiste, por edhe në funksion të përmirësimit të demokracisë. Ne duam ta vëmë politikën në duar të mira. Politika ka lindur nga nevojat e njerëzve. Evis Kushi fillimisht ishte refuzuese, pasi kishte mos-besim, mu desh durim ta bind, sikundër edhe të tjerë, që sot në pozicione me përgjegjësi të mëdha”, tha Rama.
Kryeministri tha se kanë nisur interesimet në platformën e re “online” ku mund të aplikohet duke nisur një video me një prezantim rreth ideve të angazhimit në Partinë Socialiste.
“Politika është proces. Është proces i vazhdueshëm që kërkon durim të madh, kompromise. Dua të përgëzoj ata që shoh me kënaqësi, që kanë hedhur hapin që të bëhen pjesë e platformës tonë. Shprehet e interesit janë disa dhjetra. Se kam numrin e ditës së sotme. Janë disa dhjetra. Kanë dërguar videot e tyre, atë çka kërkohet. Për të thënë pse duhet të përfshihen në këtë proces. Kush janë dhe çfarë kanë bërë. PS është një forcë që ka një virtyt të madh. Ka një virtyt qartësisht nënvizuar nga historia e saj. Është e vetmja forcë politike në Shqipëri që ka pasur përgjegjësi dhe që asnjëherë përgjegjësinë se ka shpërdoruar për të cënuar interesin kombëtar. Fatkeqësisht kjo s’mund të thuhet për forcat e tjera që kanë pasur mundësi. PS është po ashtu, duan, s’duan të tjetër, forca më e madhe politike e shqiptarëve. PS e ka pasur dhe e ka, jam i bindur se do e kenë dhe në të ardhmen, pavarësisht se kush është lideri, në ADN e vet, prirjen për tu modernizuar, duke u hapur dhe duke u shtrirë në hapësirën ku vepron dhe ku jeton shoqëria. Sot pas është përsëri në të njëjtën sfidë që ka qenë gjithmonë. Pavarësisht se si kanë shkuar gjërat, pavarësisht se PS ka faktuar dhe ka humbur, e në rastet kur ka humbur, ka humbur jo sepse e kanë mundur të tjetër. Po sepse ka mundur vetveten. S’ka qenë në lartësinë e sfidës, në lartësinë e nevojës për të mos lejuar që vendi të kthehet pas. Vendi është kthyer pas sa herë që i është dhënë mundësi që të tjerë të bëjnë atë që di të bëjë PS. Shqipëria është para një sfide sa të thjesht e të vështirë. SP është para një sfide për t’ja bërë Shqipërisë më të lehtë, dhe për mos t’ja vështirësuar të nesërmen. Sfida është që të vazhdojë kthesën deri në fund. Tani jemi futur dhe po e rrisim shpejtësinë në majën e kthesës, apo të bëjmë një kthim pas.”, deklaroi Rama.
Jo pa qëllim, kryeministri Rama zgjodhi Elbasanin për të hapur fushatën e re në rrethe. Ai i mblodhi socialistët jo në qendër të qytetit por tek inceneratori për të cilin janë hedhur akuza se nuk punon dhe se është ndërtuar sipas një procedure korruptive.
Partia Demokratike ka akuzuar qeverinë se ka miratuar ndërtimin e inceneratorit për interesa klienteliste dhe se ka paguar për shërbime të cilat nuk janë kryer.
Por kryeministri Rama i ka mohuar këto pretendime duke sulmuar gjithashtu edhe opozitën.
“Nuk na sfidojnë dot, janë shumë mbrapa. Një opozitë më mizerabël në aspektin e programit, lidershipit, të lidhjes së njerëzit me realitetin se kjo e sotmja nuk e ka pasur Shqipëria që nga 1991, edhe atëherë kur ka qenë më brutale ka qenë shumë më e vërtetë, më e ndershme edhe në marrëzinë e vet. Sot është një opozitë e pandershme që nuk ka lidhje mes zërit, figurës, qëllimit dhe prapamendimit, ca thonë lëre që e thonë për të vënë duart në kokë, por është krejt tjetër nga ca është. Prandaj miqtë e mi me kurajo dhe me një ndjenjë jo vetëm dëshirë, por edhe kënaqësie, sfidojeni veten dhe ta që janë sot në këtë skuadër për të thënë fjalën tuaj. Do kemi qindra kandidatë, mbase mund të shkojnë me mijëra, ndoshta s’do jenë të gjithë kandidatë por do jenë një e mirë për PS për ripërtitjen”, tha kryeministri. /Opinion.al
