Bashkia e Durrësit, edhe pse nuk kishte në pronësi të saj tokën në Gjirin e Lalzit, lejoi gjykatën ta quante pronare dhe të ishte pjesë e procesit pa e ankimuar vendimin. Prokuroria e Durrësit, e cila ka nisur hetimin për rastin dhe bllokoi 45 mijë m2 në zonën bregdetare, shpjegon edhe arsyet pse po verifikohet pozicioni i Bashkisë dhe Avokaturës së Shtetit, raporton “Panorama”.
Sipas saj, Pal Seçuni depozitoi padinë ndaj bashkisë për njohjen e pronës më 15 korrik të vitit të shkuar. Një ditë më vonë, më 16 korrik, gjykata ka vendosur kalimin e çështjes në seancë përgatitore dhe të njoftojë palët ndërgjyqëse për zhvillimin e seancës më 21 korrik.
Bashkia ka autorizuar Ermal Ponjarin, jurist pranë drejtorisë Ligjore të Bashkisë Durrës, që të përfaqësojë bashkinë në të gjitha shkallët e gjykimit në këtë proces gjyqësor. Në seancën e datës 21 korrik është thirrur dhe paraqitur juristi Ponjari, i cili me vendim të ndërmjetëm të gjykatës është legjitimuar si palë ndërgjyqëse.
Në këtë seancë, përfaqësuesi i bashkisë ka ngritur pretendimin se kjo pronë nuk është nën administrimin e Bashkisë Durrës dhe akoma nuk janë transferuar pronat e komunave në Bashkinë “e madhe”. Sipas tij, kryetari nuk e ka marrë ende mandatin dhe nuk është konstatuar Këshilli Bashkiak që vendos për këtë çështje.
“Gjithashtu ai ka pretenduar në seancë gjyqësore se palë në proces duhet të jetë Ministria e Ekonomisë apo Drejtoria Pyjore, e cila e ka dhënë me qira këtë pronë shoqërisë ‘Omnix Albania shpk’”, bëhet e ditur nga burimet për këtë dosje. Në seancat në vazhdim, edhe pse është njoftuar Bashkia Durrës, perfaqesuesi i saj nuk është paraqitur në asnjë seancë dhe gjykimi ka vazhduar në mungesë.
Ndërkohë, në seancën e datës 3 shkurt të këtij viti është thirrur në gjyq përfaqësuesi i Zyrës Vendore të Avokaturës së Shtetit, Admir Pahumi. Mësohet se në këtë seancë ai kërkoi që të njihet me aktin e ekspertimit dhe pas një muaji në seancë u deklarua se nuk do të merrte pjesë në gjyq, pasi “Avokatura e Shtetit nuk jep asistencë juridike në rastet e organeve të qeverisjes vendore kur nuk ka marrëveshje të posaçme etj.”.
Si në rastin e bashkisë, edhe nga ana e Avokatit të Shtetit nuk ka qenë i pranishëm përfaqësuesi në asnjë nga seancat në vazhdim. Më 25 mars, Gjykata e Durrësit ka dalë me vendim përfundimtar që ia njeh pronën Pal Seçunit, duke vënë në dijeni dy institucionet, por asnjëra prej tyre nuk e ankimoi.
Në momentin kur institucioni i Bashkisë së Durrësit ka deklaruar se nuk ishte pronar i tokës dhe gjykata e ka legjitimuar si të tillë, por, sipas Prokurorisë, bashkia duhej ta ankimonte këtë vendim të ndërmjetëm të gjykatës, ku do të kërkonte që në gjyq te thirrej ministria përkatëse.
