Situata e Vllaznisë është tejet e vështirë. Klubi mbyll pjesën e parë sezonit në vendin e parafundit në renditje, një pozicion që do të thotë rënie nga kategoria. Mirëpo, në Shkodër askush s’e beson që të ndodhë një gjë e tillë, edhe pse në kampionatin e kaluar, vetëm në 90 minutat e fundit, u vendos fati i skuadrës.
Madje, rikthimi i Fushajt në krye të klubit, jo vetëm që shikohet si bark shpëtimi për këtë sezon, por edhe për të parë Vllazninë në elitën e futbollit shqiptar në vitet e ardhshme. Mirëpo, ajo që mësohet është se, rikthimi i Fushajt në krye të këtij klubi mund të mos ndodhë ashtu siç të gjithë dëshirojnë në fillim të këtij viti. Burime të “Panorama Sport” në bashki, tregojnë se privatizimi i klubi nuk pritet që të ndodhë përpara muajit qershor 2018, që përkon me fundin e sezonit aktual.
SITUATA
Puna për privatizimin ende nuk ka nisur me vlerësimin e aksioneve dhe aseteve të klubit. Në muajin janar pritet që të fillojë puna për vlerësimin e aseteve, situatës financiare e po ashtu edhe vlerësimin e stemës së klubit. Një punë që do të ketë kohëzgjatjen e vet, ndërsa më pas do të jenë një sërë procedurash që do të kalojnë në disa hallka në Këshillin Bashkiak të Shkodrës dhe në Ministrinë e Ekonomisë.
Pra, janë disa gjëra që kërkojnë kohë për të bërë gati hedhjen në treg të aksioneve të klubit. Kësisoj, privatizimi i klubit mund të ndodhë vetëm pas përfundimit të këtij sezoni. Drejtuesve aktual të klubit i del për detyrë që të bëjnë të pamundurën që të mbajnë skuadrën në Kategorinë Superiore, në mënyrë që problemet të mos thellohen në klub. / Panorama Sport (Admir Uruçi)
