Princi Filip, 97-vjeç, bashkëshorti i Mbretëreshës Elizabet është paralajmëruar nga policia pasi u fotografua duke drejtuar automjetin pa rrip-sigurimi, vetëm dy ditë pasi ishte përfshirë në një aksident.
Gazetat britanike të shtunën publikuan fotografi të Filip që drejtonte një Land Rover të ri në rezidencën e royals’ Sandringham në Norfolk.
Policia ishte në dijeni të këtyre fotografive dhe kishte marrë masat e nevojshme. Një zëdhënës policie tha se kjo është një procedurë standarde kur denoncohen imazhe të tilla në shkelje të ligjit.
“Reuters” shkruan se pyetur për incidentin e së shtunës, një zëdhënëse e tij tha: “Është një çështje për policinë e Norfolkut“.
Të enjten, Princi Filip u përfshi në një aksident rrugor në Sandringham, ku u përplas me një automjet tjetër. Duka nuk pësoi lëndime, edhe pse automjeti i tij u përmbys.
Kurse, nga makina tjetër, Emma Fairweather theu dorën, dhe për “The Mirror” ajo ka thënë se Princi Philip nuk ka kërkuar as ndjesë.
“Unë jam me fat që jam gjallë dhe ai madje nuk ka kërkuar as ndjesë. Prisja më shumë nga Familja Mbretërore”, tha ajo.
Megjithatë, Emma shtoi se kishte marrë vetëm një telefonatë nga një oficer policie ndërlidhës, i cili i tha se Mbretëresha Elizabet dhe Duka i Edinburg dëshironin të kujtoheshin për të. Por, për Emmën kjo nuk është një ndjesë./rel.d/
