Presidenca i është përgjigjur akuzave të PSsë, se dekreti i Presidentit për datën e zgjedhjeve për Bashkinë Dibër pas shkarkimit të Shukri Xhelilit nga qeveria për skandalin seksual.
Blerina Gjylameti nga PS, tha se Presidenti duhet të priste vendimin e plotë të Kushtetueses për Xhelilin përpara se të dekretonte 11 shtatorin si datën e zgjedhjeve në këtë Bashki.
Mirëpo, Presidenca thotë se ka marrë me dt 1 gusht vendimin e plotë të Kushtetueses dhe për këtë arsye Presidenti ka caktuar 11 shtatorin si ditën e zgjedhjeve.
“Institucioni i Presidentit të Republikës mbetet i çuditur nga deklarata e subjektit politik Partia Socialiste e Shqipërisë në kundërshtim të Dekretit të Presidentit për caktimin e datës së zgjedhjeve për Kryetar të Bashkisë Dibër. Kjo deklaratë nuk është serioze dhe deformon të gjitha përcaktimet ligjore, kushtetuese dhe institucionale. Fillimisht informojmë dhe sqarojmë opinionin publik që Gjykata Kushtetuese ka njoftuar Institucionin e Presidentit të Republikës zyrtarisht, me shkresën me Nr. Prot. S30, datë 1 gusht 2016, se kjo Gjykatë ka rrëzuar kërkesën e zotit Shukri Xhelili duke lënë në fuqi Vendimin e Këshillit të Ministrave për shkarkimin e tij. Në këtë kuadër, përmes kësaj shkrese jemi informuar se data e vendimit të Gjykatës Kushtetuese është 1 gusht 2016, nga ku dhe fillon përllogaritja e datës së zhvillimit të zgjedhjeve vendore në këtë Bashki, të cilat në çdo rast janë vetëm: data 4 shtator ose 11 shtator 2016”, thuhet ne njoftimin e Presidences.
“Institucioni i Presidentit të Republikës i shpreh keqardhjen opinionit publik për përhapjen tek ai të informacioneve të pavërteta rreth përcaktimeve ligjore dhe kushtetuese që rregullojnë organizimin e zgjedhjeve në vend si dhe mbi përmbushjen e detyrimeve institucionale të Presidentit të Republikës në këtë proces. Presidenti uron dhe kërkon zhvillimin e lirë, të drejtë dhe të ndershëm të procesit të zgjedhjes së Kryetarit të Bashkisë Dibër”.
