Ministrja e Drejtësisë, Etilda Gjonaj nuk dha sot asnjë shpjegim për shkeljet e ligjit që ka konsumuar, thuhet në reagimin e zëdhënësit të Presidencës, Tedi Blushi.
Pasi ministrja e Drejtësisë, foli në një deklaratë për mediat dhe cilësoi akuzat ndaj saj nga ana e Presidentit si “spektakël për grupin armiqësor në Ministrinë e Drejtësisë” dhe komike.
LEXO EDHE – Gjonaj i drejtohet Metës: Keni hallin e reformës në drejtësi
Por në përgjigjen e zëdhënësit të presidencës thuhet se ministrja nuk dha shpjegimet konkrete për akuzat e ngritura ndaj saj.
“Shoqja Etilda nuk mundi të arsyetonte dot, se cila qe baza ligjore që e autorizon apo i jep të drejtë Ministrisë së Drejtësisë të kërkojë apo të urdhërojë botimin në Fletoren Zyrtare të një akti që nuk ishte nxjerrë prej institucionit të saj! Shoqja Etilda, nuk i dha përgjigje pyetjes, cila është ajo dispozitë e Kushtetutës dhe e Ligjit që lejon botimin në Fletoren Zyrtare të akteve të Këshillit të Emërimeve në Drejtësi. Shoqja Etilda, para se të përmendë në mekje e sipër nenet 3 dhe 4 të ligjit nr. 78/2014 “Për Qendrën e Botimeve Zyrtare”, bën mirë t`i lexojë më parë vetë”, shkruan zëdhënësi i Presidencës.
“Shoqes Etilda, bashkë me deklaratën që i dhanë të lexonte, duhet t`i kishin dhënë edhe nenin 232, të ligjit nr. 115/2016, “Për organet e qeverisjes së sistemit të drejtësisë”, që përcakton se ku botohen aktet e KED për renditjen e kandidatëve. Shoqja Etilda, anashkaloi sqarimin për falsifikimin e dokumenteve shtetërore, kur vet Kuvendi i Shqipërisë, nuk i kishte kërkuar botimin në Fletore Zyrtare. Po pse u lodhe kaq shumë moj shoqe e vërtetë Rilindase, për të mos thënë asgjë?! Etilda, trego shokët!” shton ai. /Opinion.al
