Pas kallëzimit penal të presidentit ndaj Ministres së Drejtësisë Etilda Gjonaj, kjo e fundit për të parën herë ka dalë përpra mediave të sqarojë, akuzat e ngritura.
Që në fillim të fjalës së saj , Gjonaj tha se nuk është shprehur më herët, pasi ka dashur t’i japë kohën e mjaftueshme presidentit për të ezauruar atë që ajo e quajti “spektakël për grupin armiqësor në Ministrinë e Drejtësisë”, ndërsa shtoi se Meta ka hallin e madh që i motivon në luftën kundër Reformës në Drejtësi.
“Nuk e kam bërë këtë shtjellim më parë, sepse kam gjykuar që i duhej lënë Presidentit koha dhe hapësira e plotë mediatike për të ezauruar të gjitha seritë e spektaklit të tij politik mbi “grupin armiqësor dhe kriminal” në Ministrinë e Drejtësisë. Nuk e bëj këtë sqarim sot as për t’iu përgjigjur Presidentit, për morinë e akuzave dhe as për tju përgjigjur fjalëve të padenja që ka lëshuar publikisht në drejtimin tim, personalisht apo përmes zëdhënësve të tij. Unë u rezervoj të gjithë keqardhjen time për hallin e madh që i motivon në luftën kundër Reformës në Drejtësi, por akuzat ndaj meje nuk jua lehtëson këtë hall”, tha Gjonaj.
Ministrja e Drejtësisë shpjegoi të gjitha akuzat e ngritura nga Presidenca, duke e cilësuar një show pretendimin e presidentit për rrëmbimin e kompetencave.
Ndërsa foli për mënyrën e zgjedhjes së anëtarëve të Gjykatës Kushtetuese, Gjonaj tha nder te tjera se gjyqtarja e presidentit, e zgjedhur në mënyrë antiligjore, ushtron sot funksionin si anëtare e gjykatës kushtetuese.
“Parashikimet ligjore dhe kushtetuese për përzgjedhjen e anëtarit të GJK nga Presidenti janë shumë të qartë. Sipas parashikimeve të ligjit për Gjykatën Kushtetuese, Presidenti ushtron të drejtën e zgjedhjes së gjyqtarit kushtetues brenda 30 ditëve nga marrja e listës prej Këshillit të Emërimeve ne Drejtësi. Presidenti e ushtron këtë të drejtë në dy forma:
- a) ose nëpërmjet dekretit duke zgjedhur një nga tre kandidatët që i ka dërguar KED ose,
- b) në mënyrë të heshtur, duke pranuar që kandidati i renditur i pari nga Këshilli i Emërimeve në Drejtësi të konsiderohet i emëruar.
Qëllimi i vendosjes së këtij afati apo mekanizmi zhbllokues ka qenë pikërisht shmangia e bllokimit të zgjedhjes së anëtarit të Gjykatës Kushtetues për shkaqe politike apo teknike. Kjo ishte edhe një nga risitë e reformës në drejtësi e përkrahur edhe nga Komisioni i Venecias.
Por çfarë ndodhi?
Afati 30 ditor i Presidentit për të zgjedhur anëtarin e Gjykatës Kushtetuese përfundoi dhe Presidenti nuk e e ushtroi të drejtën e tij brenda afatit 30 ditor. Theksoj se ky është një afat prekluziv, pra i pandryshueshëm dhe i pa-pezullueshëm, për shkak se vetë ligji e ka lidhur kalimin e këtij afati me ardhjen e një pasoje. Pra, me kalimin e këtij afati, bëhet automatik emërimi si anëtar i Gjykatës Kushtetues i kandidatit që është renditur i pari.
Për këtë shkak, Arta Vorpsi, që ishte renditur e para nga KED si institucion I pavarur, si institucioni i përbërë nga Prokurorë dhe Gjyqtarë të të gjitha niveleve, konsiderohet e zgjedhur gjyqtare Kushtetuese automatikisht nga ligji (ex lege) me datë 08.11.2019.
Referuar botimit të aktit në Fletoren Zyrtare ditën e shtunë si një ditë pushime zyrtar, Gjonaj tha: “E kam vështirë të besoj që presidenti e beson këtë variant kaq ekstrem për imagjinatën e ccdo njeriu normal. Sikur presidenti apo këshilltatrët e tij, të kishin bërë një kërkim sipërfaqësor në arkiv, jo vetëm e shtuna por dhe e diela janë ditë që figurojnë shumë kohë më përpara në Fletoren Zyrtare”, u shpreh Gjonaj.
Duke vijuar këtë argument Ministrja e Drejtësisë i cilësoi akuzat për shkelje penale si komike.
“Presidenti ka ngritur akuzën se publikimi në Fletoren Zyrtare ka krijuar pasoja të rënda. Pyetja ime është çfarë pasojash ka krijuar ky botim. Botimi në Fletoren Zyrtare nuk i jep fuqi akteve që publikohen përveç atyre që parashikohen ne ligj, por thjesht informon qytetarët. Botimi i këtij vendimi garanton dhe trajtimin e njëjtë të të gjithë anëtarëve të Gjykatës Kushtetuese pavarësisht se janë zgjedhur nga Presidenti, Kuvendi apo në mënyrë automatike. Akuza se ne kemi kryer shkelje penale është thjeshte komike do të thoja, po mos bëhej fjalë për presidentin e Shqipërisë. Ai botim nuk ka sjellë asnjë pasojë. E vetmja pasojë është dalja e Presidentit jashtë kornizave ligjore”.
Lidhur me kallëzimin penal nga e presidentit, Gjonaj refuzoi të komentojë.
“Por meqenëse Presidenti ka dorëzuar kallëzimin penal ndaj meje në SPAK, rezervoj të drejtën të mos jap asnjë koment mbi këtë kallëzim, në respekt të ligjit dhe funksionit të institucioneve të reja të Drejtësisë që kanë dalë nga reforma në drejtësi”. / Opinion.al
