Prek Cali, burri legjendar i shekullit të fundit, po ‘dhunohet’ përsëri në simbolet e tij dhe të kombit.
Një makinë rëndë e policisë ka shkatërruar shtëpinë e tij muze në Vermosh.
Banorët e Vermoshit dhe familjarë të patriotit Prek Calit protestuan dje pas shembjes ‘tinzare’ nga policia të mureve të Kullës muze të Prek Calit.
Banorët dënuan ashpër ndërhyrjen e Policisë e cila me fadromë prishi muret të cilat kishin nisur të restauroheshin. “Kjo është vdekja e dytë që i ndodh Prek Calit dhe kullës së tij”, thanë banorët.
Prek Cali është një nga atdhetarët më të mëdhenj të kombit. Në sajë të rezistencës së tij dhe trimave që udhëhoqi, në vitet ’19 të shekullit të kaluar, u bë e mundur që trupit të atdheut të mos i shkëputej Vermoshi dhe zona të Kelmendit. Ai u vendos në pozita kundër diktaturës komuniste që me instalimin e saj në vendin tonë, dhe për këtë arsye regjimi e pushkatoi.
Në momentin, që do ta ekzekutonin toga e zezë e pushkatimit komunist, kërkojnë që të denuarit me pushkatim të kthehen mbara (me shpinë) dhe t’ua mbyllin sytë. Por Prekë Cali, në mënyrë kategorike kundërshton, duke thënë fjalët: “ – Nuk shkohet n’Parajsë me shpin dhe me sy t’mbyllun” dhe siç ishte duarlidhur, ngrehi kryet lart, hapi gjoksin, duke shkyer pullat e këmishës dhe u tha: “ – Kështu vdes shqiptari”. Para se të rrëzohej, ai trup si një lis, nga plumbat e shqiptarëve të armiqve të nacionit të vet, zëri i fuqishëm i malësorit të bjeshkëve, ushtroi si jehona e luginave: “ – Rrnoft Shqipnia! Rrnoft populli shqiptar! Heret a vonë Shqipnia do të fitojë.”
Shqiptarë nga Amerika bënë të mundur mbledhjen e një fondi për të restauruar Kullën prej guri të patriotit të madh Prek Cali, për ta kthyer atë në një muze. Përpjekja e shqiptarëve në diasporë erdhi për të nderuar veprën patriotike të Prek Calit, që nga rezistenca e tij në fillimet e shtetit shqiptar, që bënë të mundur që Vermoshi të jetë pjesë e Shqipërisë, e deri në rezistencën e parë kundër komunizmit në Shqipëri, gjë për të cilën Prek Cali u ekzekutua.
Në mbështetje të protestës është angazhuar edhe PD. Kryetarit i PD-së në Malësinë e Madhe, Anton Kokaj, mbështeti protestën e banorëve të Vermoshit duke e cilësuar aktin e policisë si çnjerëzor duke përdhosur kujtimin e patriotit më të madh të zonës së Kelmendit, Prek Cali.
Në mëngjes herët, ka reaguar ashpër edhe deputeti Tom Doshi, i cili ka edhe lidhje gjaku me heroin antikomunist Prek Cali. Doshi ka theksuar se ky është një akt barbar dhe shprehje e urrejtjes ndaj qëndrestarëve antikomunistë si Prek Cali. Ai shkruan se ndjen një keqardhje të veçantë për mundin e komunitetit shqiptar të Amerikës që kontribuan financiarisht për punimet që ishin bërë deri dje dhe për një gjest të tillë, u kërkon falje të gjithë shqiptarëve.
“Pikërisht ata që duhej ta kishin mbrojtur shtëpinë e prijësit dhe të mbrojtësit të tokave shqiptare, heroit Prek Cali, e rrafshuan edhe atë pak gjë që kishte mbetur në këmbë”, thekson Doshi.
Sipas tij, ku akt barbar turpëron ata që i kanë marrë votat malësorëve dhe tregon se urrejtja ndaj qëndrestarëve antikomunistë si Prek Cali nuk ka fund.
Ndërkaq, Tom Doshi, njëkohësisht edhe i afërm i Prek Calit, premton se kulla do të ndërtohet ashtu siç edhe ka qenë dikur. Ai shkruan se askush nuk mund t’a mposhtë kujtimin e atij burri të kombit.
“Unë vetë si kushëri i tij, si deputet dhe si qytetar, ju jap fjalën që shtëpia e Prek Calit do të ndërtohet trekatëshe për Vitin e Skënderbeut”, premton ai.
Për prishjen e kullës së antikomunistit Prek Cali në Malësinë e Madhe, ka reaguar edhe kryedemokrati Lulzim Basha. Më herët, përmes një shënimi në Facebook, Basha theksoi se Edi Rama nuk mund t’a durojë nderimin e një prijësi legjendar antikomunist si Prek Cali, ndërsa shtoi se prishja e kullës është goditje e simbolit të kryengritjes së Kelmendit, revoltës së parë antikomuniste të Europës.
“Ato mure në kullën e Calëve u ndërtuan falë donacionëve të shqiptarëve patriotë të Amerikës. Qeveria duhej t’a legalizonte restaurimin për atë çka Kulla e Prek Calit përfaqëson për Kelmendin, Malësinë dhe gjithë Shqipërinë”, shkruan Basha.
Ai deklaron se gjesti i Edi Ramës, është një akt urrejtje por edhe dobësie, pasi kur kthen pinjollët e Byrosë dhe xhelatët e diktaturës në krye të vendit, të tremb kujtimi dhe hija e Prek Calit.
“Kelmendasit, malësorët dhe mbarë shqiptarët patriotë do t’ia japin përgjigjen pjellës së keqe”, thekson Basha.
Ish-kryeministri Sali Berisha ka qenë i pari që denoncoi shembjen e kullës se heroit antikomunist Prek Cali në Vermosh të Malësisë së Madhe nga fadromat e IKMT-së. Përmes një shënimi në Facebook, Berisha, për këtë veprim akuzoi kryeministrin Edi Rama, ndërsa e quajti një akt hakmarrjeje primitive.
Pavarësisht ndryshimeve, kohës dhe mentaliteteve, emri i Prek Calit ka forcën të zgjojë dhe të ndajë në, pro dhe kundra, “shqiptarët e fjetur” nga njëra anë, ndërsa nga tjetra të djathtët dhe të majtët, si rrjedhojë duke evidentuar jo shumë ndryshime në shoqërinë shqiptare si gjatë periudhës së regjimit socialist totalitar dhe pas shpërbërjes së një regjimi të tillë deri në ditët tona.
Pikërisht këtë ide të lartpërmendur, e skicon mjaft bukur, debati mes ish-zv/ministrit të Mbrojtës, Dritan Hila dhe një djali të ri, gazetar dhe studiues Erald Kapri.
