Shkrimtari Preç Zogaj dhe bashkëshortja e tij janë shëruar nga COVID-19. Ai e ka konfirmuar vetë një gjë të tillë në një mesazh në “Facebook” ku shkruan se beteja me virusin zgjati 3 javë.
Zogaj shpreh falenderim për mjekët që e kuruan gjatë atij që ai e quan “regjim” të COVID-19. Por lajmi i shërimit nuk ka sjellë buzëqeshje në familjen e tyre pasi siç bën me dije shkrimtari, virusi vdekjeprurës ka ndarë nga jeta dy persona të afët të familjes, vëllezërit e gruas së tij që ai i kishte miq të mirë.
“Pas tri javesh në ” rregjimin” e Covid 19, me në fund unë dhe ime shoqe morën përgjigjen se tamponat tanë dolën negativë. Shumë njerëz të prekur kanë dhënë dëshmitë e tyre për vuajtjet fizike dhe psikologjike që shkakton ky virus i rrezikshëm. Nuk kam ndonjë gjë të veçantë për tu shtuar, veç ti rikonformoj ato dëshmi dhe të nënvizoj ankthin e një beteje të zgjatur në kufinjtë fluidë të përkeqësimit dhe përmirësimit, kur në ditët e sulmit, pasi ka hyrë si kalë tropje në organzimin tonë, vurisi shfaq karakteristikën që tashmë ia ia njohim të gjithë: dinakërinë.
Kemi një falenderim të madh për mjeket dhe infermierët që asistuan shërimin tonë. Në veçanti për mjekun, Arjan Mezini, pneumolog në spitalin “Shefqet Ndroqi”. Doktor Arjani është pjesë e një komuniteti mjekësh e infermierësh, që po luftojnë prej muajsh, si heronjë të vërtetë, në vijën e parë të betejës kundër armikut më të madh të shëndetit të njerëzve në këtë kohë, që shpresojmë të mos jetë epokë.
Për të mund të them: patëm fat që ishim pacientët e tij.
Fëmijët tanë morën frymë të lehtësuar sot. Por buzeqeshjet e tyre dhe tonat janë dënuar të mos i bëjë shoqëri këtij lehtësimi. Sepse gjatë ditëve të pengmarrjes sonë nga Covidi kemi humbur dy njerëz shumë të shtrenjtë, Gjinin dhe Gjergjin, vëllëzërit e gruas sime, shokët e mi të mirë, dy njerëz të thjeshtë, që jetuan gjithë jetën në shenjën e Ndershmërisë ektreme, të cilën nuk e menduan asnjë ditë jashtë mode, por ua trashëguan si pasurinë më të madhe fëmijëve të tyre, Majlindës, Merit, Artës, Florit, Tonit.Pushofshi në paqe Gjin dhe Gjergj. Zemrat tona do të jenë gjithmonë Memoriali juaj.”, shkruan Preç Zogaj. /Opinion.al
