Ajo që është mohuar vazhdimisht nga Ministria e Brendshme dhe Policia e Shtetit, tashmë pranohet dhe madje kërkohet ndihma e qytetarëve. Bëhet fjalë për implikimin masiv të punonjësve të policisë në trafikun e drogës.
Duke folur me shifra, numri II i Policisë së Shtetit, Altin Qato deklaroi se për 3 muaj (Janar, Shkurt, Mars 2017) janë hetuar nga Drejtoria e Standardeve Profesionale, 58 punonjës policie, nga të cilët, 13 punonjës policie janë përjashtuar, 1 paralajmërim dhe 1 vërejtje, ndërsa të tjerët janë në proces hetimi penal dhe administrativ.
Ai u bëri thirrje qytetarëve të denoncojnë nëse dinë raste të policëve që mbrojnë trafikantët e drogës. Për këtë tha Qato do të ketë shpërblim deri në 3 milionë lekë të vjetra.
“Në dispozion të publikut kemi vënë linjën e gjelbër 0800.90.90 për çdo informacion mbi rastet e implikimit apo favorizimit të kësaj veprimtarie të kundraligjshme, nga punonjës Policie dhe jo vetëm.
Çdo e dhënë apo informacion do të vlerësohet nga SHÇBA, duke ruajtur e garantuar anonimatin dhe për çdo shtetas që do të ofrojë informacion të vlefshëm, është vënë në dispozion një fond shpërblimi, i cili për nga rëndësia dhe vërtetësia e informacionit do të shkojë deri në 300 mijë lekë”, deklaroi drejtori për rendin në Policinë e Shtetit.
Arrestime dhe konfiskime
Në 3 muaj, policia thotë se ka kryer 14.858 kontrolle në sera, tunele, ish depo të rezervave të shtetit, magazina, etj.
“Janë arrestuar 379 autorë, si dhe janë referuar materialet në Prokurori për 243 autorë të tjerë.
Janë sekuestruar gjithsej rreth 28 ton kanabis, 1 kg kokainë, 12 kg heroinë”, deklaroi zyrtari i lartë i policisë.
/Opinion.al
