Sociale

Pjepri jo i sigurt, AKU: Rasti nuk është denoncim, nuk ka vend për alarm  


               Publikuar në : 10:54 - 12/07/19 |
Al Do

Tv Klan publikoi para disa ditësh një skandal në lidhje me nivelin e lartë të nitrateve tek pjepri në tregun shqiptar. Në të gjitha matjet e kryera me një pajisje të certifikuar ndërkombëtarisht, në katër tregje të Tiranës, niveli i nitrateve varion nga 540 në 850, por në fakt niveli i lejuar është 90 miligramë për kilogram.

Nutricionistja Albana Daka u shpreh se këto nivele janë skandaloz dhe rrezikojnë shkaktimin e kancerit në organizëm.

“Në qoftë se këto norma tejkalohen dhe fatkeqësisht në shumicën e rasteve janë të tejkaluara, të dyja këto elementë kur futen në organizëm, sidomos nitratet ndërmjet enzimave të gojës, kthehen në nitrite të cilat pastaj pasi kalojnë në aparatin tretës në stomak, ndërmjet aciditetit të stomakut kalojnë në disa lëndë që quhen nitrozamina të cilat janë substanca potencialisht kancerogjene”, thotë Albana Daka.

Megjithatë Autoriteti Kombëtar i Ushqimit (AKU) ka reaguar duke thënë se rasti i nuk ka besueshmëri të nevojshme për tu trajtuar si denoncim. Sipas tyre Shqipëria ka qenë e suksesshme në eksportet e fruta-perimeve dhe nuk ka pasur ankesa lidhur me këtë fenomen. Ata shtojnë më tej se pajisja me të cilën është kryer testimi nuk mund të jetë shumë e besueshme dhe se analizat e tyre laboratorike janë të certifikuara për të nxjerrë rezultate zyrtare.

Autoriteti Kombëtar i Ushqimit (AKU) thekson se “gjatë këtij viti kemi thuajse pesëfishuar eksportet tona në vendet e BE-së dhe jo vetëm, si dhe nuk kemi asnjë ngarkesë fruta-perimesh të kthyer mbrapsht në vendin tonë për arsye të nivelit mbi normën e lejuar të mbetjeve (nitrateve) në këto produkte (konkretisht pjepër). Për rastin e trajtuar mediatikisht nuk ka vend për abuzim/manipulim apo spekulim në komunikimin publik duke krijuar panik të panevojshëm dhe fiktiv për konsumatorët. AKU trajton me seriozitetin maksimal të gjitha indiciet apo denoncimet lidhur me problematika që mund të cenojnë sigurinë ushqimore, por rasti konkret nuk evidenton besueshmërinë e nevojshme si denoncim. Ajo çfarë u paraqit në media nuk përmban as detaje të integritetit dhe gjurmimit të mostrës së produktit (konkretisht, vendin e origjinës pra prodhuesin/fermerin, subjektin tregtues, kushtet e ruajtjes, detaje të dokumentacionit shoqërues mbi këtë produkt), si dhe as besueshmërinë në përdorimin e aparatit dhe saktësinë e tij në matje”.

Sa i përket rastit konkret të trajtuar në denoncim, e rëndësishme është që ato produkte qarkullojnë brenda tregut shqiptar dhe pavarësisht origjinës duhet kontrolluar për cilësinë e tyre nga autoriteti vendas. AKU nuk pranon ta trajtojë rastin si denoncim por nuk jep shpjegime se kur mund të quhet i tillë një rast. Shqipëria mund të ketë pasur eksporte mjaft të suksesshme por ato janë produkte që nuk konsumohen nga qytetarët shqiptarë kështu që nuk ka interes publik vendas në lidhje me cilësinë e tyre. Rasti në fjalë paraqet të dhëna shqetësuese që lidhen drejt për drejtë me shëndetin e qytetarëve. Kështu që deri në një testim të dytë të faktuar nga AKU kjo çështje mbetet pa përgjigje. /Opinion.al

Pas