Nga Reldar Dedaj
Televizioni kombëtar “Klan” në emisionin e tij investigativ “Stop” transmetoi dy ditë më parë një video të një skandali korruptiv në Gjykatën e Shkallës së Parë të rrethit Gjirokastër.
Një qytetare ka regjistruar Guximtar Boçin, kryetar i Gjykatës. Gjyqtari dhe njëkohësisht kryetar i Gjykatës, Boçi, pasi ka zvarritur dhe “personalizuar” një çështje gjyqësore të paraqitur në gjykatën ku ai është kryetar, më në fund, qytetares që kërkonte drejtësi, i ka kërkuar favore seksuale si shpërblim të “dhënies së drejtësisë”.
Bisedat seksuale mes kryetarit dhe qytetares, zonja i ka regjistruar dhe i ka dërguar në redaksinë e emisionit investigativ “Stop”.
Menjëherë pas shfaqjes në publik të videos së regjistruar opinioni publik dhe jo vetëm është tronditur nga regjistrimet audio të denoncuar përgjatë emisionit.
Guximtar Boçi është 53-vjeç, baba i dy vajzave, ndërsa në krye të Gjykatës së Gjirokastrës kishte tre vite që ishte emëruar. Boçi ka qenë gjyqtar pranë kësaj gjykate prej më shumë se 20 vitesh.
Pak minuta pas transmetimit në TV Klan, u tha se ai e mësoi lajmin e skandalit në një ditë të shënuar, gjyqtari po festonte bashkë me miqtë dhe kolegët, pasi në fundjavë do të martonte vajzën e madhe.
Nga ana tjetër, qyteti i gurtë i Gjirokastrës, me siguri do jetë tronditur. Madje vetë gjirokastritët arritën të krijonin një mit të tillë. Thuhet se për t’a nderuar i vendosen edhe emrin qytetit. Mbretëresha Argjiro që u hodh nga shkëmbi për të mos rënë në dorë të pushtuesit, në vend të përçudnimit, zgjodhi me vetëdijeni të plotë sakrifikimin e vetes.
A nuk ndodhi kështu edhe me 40 vjeçaren që kërkoi drejtësi? Në vend të ‘dorëzimit’, ajo zgjodhi luftën edhe pse ju premtuan plumba nëse denoncon. Një qytet provincial si Gjirokastra, ku sot shumë pak gjë e lidh me mitin e Argjiros, a do dijë vallë të vendosë drejtësi morale për atë nënë të gjorë? Këtë gjë më mirë se koha asnjë tjetër nuk mund ta dijë. Edhe pse teoria e baltës, që në orët e vona të natës, filloi të hidhej kundrejt asaj.
Vetë gjyqtari Boçi, pak minuta pas videoskandalit, deklaroi se nuk ka biseduar me gruan që ka bërë denoncimin dhe se e hedh poshtë me neveri një bisedë të tillë. Ai bëri me dije se çështjen do ta ndjekë në rrugë ligjore.
Nga bisedat e kundruara me shumë vëmendje në rrjete të ndryshme sociale, vihet re lehtësisht, një urrejtje e madhe ndaj një gjesti të tillë. Shumë nga ato e vinin theksin tek babëzia e një njeriu që fatkeqësisht nuk ka fund, tek injoranca e tij, tek sistemi i drejtësisë në vend që fillon e mbaron tek ryshfeti, në mosqoftë me lek, është në forma të tjera të kësaj natyre.
Ky qytet guri e hijerëndë me siguri ka parë shpeshherë sa ditë të mira, po aq edhe të vështira. Ndoshta pikërisht për këtë, për faktin se ka qëndruar atje në ditë të mira e të këqija, dëshmitar e rob i historisë, tregimtar e jotregimtar, i qeshur sa edhe i zymtë, krenar sa edhe qortues, ai ka fituar dalëngadalë peshën e të qenurit simbol.
Pas atij skandali qyteti i Gjirokastrës, me shumë siguri, nuk është ai i djeshmi.
Mëngjesi sapo kishte filluar të shtriqej duke u hapur i gjithi mbi shtratin e qulltë të luginës së Drinosit. Atje tutje, në fund të konkretësisë së hirtë të gurit, matanë ndërtesave hijerëndë si gurë të imët të një kurore mbretërore, rrezet e diellit po e shtyjnë drejt hiçit tylin e agut duke zhveshur ngadalë qytetin e gurtë. Qafa e pazarit nuk është më fare asaj ane, po në krahun e kundërt, tamam në atë drejtim ku tani është dielli, mbrapa tij. Hankonatët nuk banojnë më në shtëpinë e tyre të madhe. Kako Pino, Xhexhoja dhe Mane Voco vazhdojnë ende si kahera të trazojnë thashethemet e qytetit. Zekatët, pak metra më poshtë, kanë lënë dyer e dritare hapur që dielli të thajë lagështirën e mjegullës. Shtëpia e vjetër e një miku shkolle nuk është më, e reja është diku tjetër poshtë koracës së gurtë, në ndërtim të vazhdueshëm për t’iu përshtatur kërkesave të reja të kohës: dritare të gjëra duralumini, lule të gjithëfarshme artificiale, dyer që puthiten mirë me dyshemenë, parket druri ngjyrë arre, mure të bardha, banja e zhytur në shkëlqimin e kaltër të pllakave majolike të importit. Me shumë siguri, të gjitha këto duken disi ndryshe një ditë më pas skandalit, teksa lumi Drinos rrjedh krejt i qetë për t’u takuar me Vjosën pa i parë Tepelena.
