Byroja e Kuvendit të Shqipërisë ka vendosur sot pas një video-konference që të përgjysmojë pagat e deputetëve për 3 muaj në shenjë solidariteti me qytetarët dhe bizneset e prekur nga masat e ndërmarra për parandalimin e përhapjes së koronavirusit.
“Byroja vendosi që, në kuadrin e masave për të lehtësuar përballimin e situatës së pandemisë, krijuar nga koronavirusi COVID-19, në shenjë solidariteti me qytetarët dhe bizneset e prekur nga masat ndaluese të koronavirusit, paga e deputetëve të Kuvendit të Shqipërisë të përgjysmohet për një periudhë tremujore”, thuhet të njoftimin e Kuvendit.
Kryetari i Kuvendit, Gramoz Ruçi iu është drejtuar gjithashtu drejtuesve të 30 institucioneve kushtetuese dhe atyre të krijuara me ligj për të ndërarrë këtë nismë , si kontribut në lehtësimin e përballimit të nevojave për parandalimin e përhapjes së koronavirusit.
“Në këtë kuadër, Kryetari i Kuvendit, Gramoz Ruçi u është drejtuar me një letër drejtuesve të tridhjetë institucioneve kushtetuese dhe institucioneve të krijuara me ligj, të marrin të njëjtën nismë, për përgjysmimin e pagës së tyre për një periudhë tremujore, si kontribut në lehtësimin e përballimit të nevojave për parandalimin e përhapjes së këtij virusi të rrezikshëm”.
Ditën e djeshme grupi parlamentar socialist vendosi që vullnetarisht të heqë dorë nga gjysma e pagës së tyre në shenjë solidariteti. Nuk është ende e qartë nëse nisma e tyre ka lidhje me vendimin e sotëm të Byrosë së Kuvendit ose nëse ata do të dhurojnë gjysmën tjetër të pagës së tyre.
Më herët përgjysmimin e pagës e ka njoftuar kryeministri Rama për veten e tij dhe kabinetin e ministrave. Të njejtën gjë e ka bërë dhe Presidenti Meta dhe zyrtarët e presidencës. /Opinion.al
