Kryesore

Përgjimet, Rama nis proces gjyqësor ndaj gazetarit gjerman


               Publikuar në : 16:00 - 25/06/19 |
geliano fataj

Kryeministri Edi Rama thotë se ka çuar në gjyq gazetarin gjerman, të gazetës Bild. Në një postim në Tëitter, Rama shkruan se gjykatat gjermane le ta vendosin kush ka të drejtë e kush ka faj në këtë mes

“Sapo i kam dhënë prokurën avokatit gjerman Matthias Prinz, për nisjen e procesit gjyqësor mbi publikimet e BILD! Gjykatat gjermane le ta vendosin kush ka të drejtë e kush ka faj në këtë mes. E bëj sepse shqiptarët meritojnë ta dinë të vërtetën nga drejtësia e atij vendi pa hije”, shkruan Rama.

Peter Tiede, ditën e fundit ka publikuar mbi dhjetëra përgjime në gazetën ku ai punon, të cilat janë pjesë e dosjeve 339 të Durrësit dhe 184, të Dibrës.

Përgjimet vënë në dukje lidhjet direkte që Astrit Avdylaj, kreu i grupit kriminal, mbante me kryetarin e Bashkisë së Durrësit Vangjush Dako, por dhe me kandidatin aktual të Partisë socialiste për Bashkinë e Shijakut Elton Arban, si dhe angazhimin e Avdylajt për të siguruar vota për Partinë socialiste dhe një prej kandidatëve të saj, deputetin aktual Ilir Ndraxhi.

Ndërkohë për dosjen 184, në përgjimet dëgjohen ish ministri i brendshëm Saimir Tahiri, ish ministri i energjisë Damian Gjiknuri si dhe deputetë socialistë, që bisedojnë me policë, biznesmenë dhe persona të dyshuar për veprimtari të paligjshme në krahinën e Dibrës.

Ata urojnë njëri tjetrin për maksimalizimin e fitores së zgjedhjeve me presione dhe forma të ndryshme. Atyre u premtohet se do të promovohen në karrierë, sepse ndihmuan fuqishëm fitoren e thellë të PS-së.

Në përgjimet e publikuara dëgjohen edhe disa metoda të blerjes së votave në favor të PS-së, mbledhjes së kartave të identitetit dhe presioneve që u bëhen qytetarëve për të votuar familjarish pro PS-së.

Në përgjimet dalin edhe përgjimet e veprimtarëve elektoralë të PS-së për të penguar në punën e tyre gazetarët investigativë të Top Channel dhe të programit Fiks Fare, që kishin siguruar filmime me blerje votash dhe tufa parash nëpër duart e tyre./ Opinion.al

Pas