Bota

Peng nga viti 2016, talibanët lirojnë një amerikan dhe një australian


               Publikuar në : 12:25 - 19/11/19 |
el ida

Dy pengje u liruan nga paraburgimi taliban, në këmbim të lirimit të tre të burgosurve talibanë nga Qeveria e Afganistanit.

Amerikani Keven King dhe australiani Timothy Weeks u liruan në qarkun Navbahar, të provincës Zabul, një rajon që kontrollohet kryesisht nga talibanët.

Pak orë para lirimit të tyre u raportua edhe për lirimin e tre komandantëve të lartë talibanë, që mbaheshin nga autoritetet afgane.

Një javë më parë, presidenti i Afganistanit, Ashraf Ghani, ra dakord për lirimin e tre talibanëve në këmbim të dy pengjeve perëndimore, duke shfaqur shpresën se një gjë e tillë mund t’iu hapë derën bisedimeve për paqe me talibanët.

Këta të fundit, deri më tani kanë refuzuar të bisedojnë me Qeverinë në Kabul, duke e konsideruar atë si “kukull” të Perëndimit.

Lufta në Afganistan ka nisur prej 18 vitesh, kur SHBA-ja ka ndërhyrë për të rrëzuar regjimin taliban nga pushteti. Ndërkaq, Shtetet e Bashkuara kanë zhvilluar një seri bisedimesh me përfaqësuesit e talibanëve në Katar, gjatë viteve të fundit, por ato janë ndërprerë, pa sjellë ndonjë rezultat të madh./Opinion.al

Pas