Partia Demokratike ka kërkuar ditën e sotme përjashtimin e 7 prej 8 gjyqtarëve të Kolegjit Zgjedhor, që kanë rrëzuar paditë për Gjirokastrën, Vlorën dhe Beratin.
Sipas selisë blu, me vendimet e dhëna deri tani, këta gjyqtarë, njësoj si komisionerët politikë të KAS, kanë refuzuar transparencën mbi masakrën zgjedhore të 25 prillit.
Po ashtu PD thotë se refuzimi i kërkesave për marrjen zyrtarisht të provave i vendos këta gjyqtarë në pamundësi për të gjykuar me paanësi 6 kërkesa të tjera të ngjashme për blerjen e votës dhe deformimin e rezultatit të zgjedhjeve.
Në shkresën e PD për zëvendësimin e 7 gjyqtarëve të Kolegjit Zgjedhor, thuhet se duke nisur nga vendimet e mëparshme edhe për 6 paditë e tjera rezultati do të jetë i paracaktuar, në shkelje të Kushtetutës dhe Kodit Zgjedhor.
PD vlerëson se vazhdimi i ankimimeve me të njëjtën trupë zgjedhore, e cila është shprehur 3 herë me radhë kundër kërkesës së selisë blu për transparencën e zgjedhjeve, është në shkelje të parimeve themelore të Gjykatës së Strasburgut për dhënien e drejtësisë.
