Partia Demokratike ka ngritur pretendimin se tashmë është në dorë të gjykatave që procesi i 30 qershorit të shpallet jo i ligjshëm.
Në nje deklaratë për mediat, sekretari i përgjithshëm i Partisë Demokratike, Gazment Bardhi tha se “ekziston akoma mundësia që votimet e 30 qershorit të refuzohen edhe “de juro” si të paligjshme. Këtë mund ta bëjnë gjykatat në të gjithë Shqipërinë”.
Që ta bëjnë këtë, gjykatat kanë dy mënyra sipas tij. E para që gjyqtarët të mos vërtetojnë si të vlefshëm mandatet dhe e dyta të pezullojnë gjykimin derisa dekreti i presidentit të shqyrtohet nga Gjykata Kushtetuese.
Sipas ish-deputetit Bardhi, gjyqtarët duhet ti referohen ligjeve të vendit dhe të mos i nënshtrohen kërcënimeve me vetting nga kryeministri Rama.
“Sipas ligjeve të vendit, që një Kryebashkiak të marrë detyrën, mandati i tij duhet të vërtetohet nga gjykata, nëse është marrë në përputhje me Kushtetutën, nëse është fituar apo jo në zgjedhje të organizuara në mbështetje të Dekretit të Presidentit. Nëse gjyqtarët do të tregojnë integritet, do t’i binden ligjit dhe nuk do t’i nënshtrohen kërcënimeve me vetting apo me mjete të tjera mafioze, të përdorura më parë nga Edi Rama, vendimi i tyre është shumë i thjeshtë: të respektojnë kompetencën kushtetuese të Presidentit për të shpallur datën e zgjedhjeve” tha Bardhi.
Ai shtoi se dhe në raportin e ODHIR cilësohet qartë se dekreti i presidentit mund të shqyrtohet vetëm nga Gjykata Kushtetuese. Pra për sa kohë që ajo nuk është shprehur, dekretet mbeten në fuqi gjë që rrjedhimisht e bën procesin e 30 qershorit jo të vlefshëm ligjërisht.
Prandaj sekretari i përgjithshëm i PD i bën thirrje gjyqtarëve të mbrojnë shtetin e së drejtës duke i dhënë kohë krijimit të Gjykatës Kushtetuese dhe vendimit të saj për dekretet e presidentit. Vetëm pas kësaj, ata le të vendosin për mandatet dhe zgjedhjet e 30 qershorit.
“Kjo është pengesa e fundit institucionale mes demokracisë dhe diktaturës! Është pengesa e fundit institucionale që Edi Rama të marrë nën kontroll të plotë, me votime të paligjshme, edhe hallkën e fundit të pushtetit në vend, pushtetin lokal” mbylli Gazment Bardhi deklaratën. /Opinion.al
