Astrit Patozi, deputeti i PD-së shprehet se deklaratat e kryeministrit Rama për Presidentin e zgjedhur në SHBA, Donald Trump janë tërësisht të ekzagjeruara.
Në një intervistë për “Abc News”, Patozi shprehet se Rama e ka marrë tashmë koston e “bastit” që vuri për zgjedhjet në Shtetet e Bashkuara të Amerikës, ndonëse e cilëson diçka shumë të rëndë të përfshihesh në një garë që nuk i takonte Kryeministrit të një vendi të vogël si Shqipëria.
“Unë mendoj që e gjithë ajo që bëri Rama ishte një ekzagjerim. Dhe në rast se politikanët ndëshkohen për qëndrimet e tyre, Rama e ka marrë ndëshkimin. Jo nga vota e amerikanëve, por nga mënyra se si ai u ekspozua përpara shqiptarëve dhe përpara faktorit ndërkombëtar, si një Kryeministër joserioz.
Gjëja më e mirë që mund të bënte Rama, nuk do ishte ndjesa, sepse besoj unë sepse do të ishte hipokrite. Po të isha në vendin e tij, do të heshtja. Sepse çdo shpjegim që mund të jepet vetëm sa e rëndon më shumë pozicionin e tij dhe kështu ka ndodhur. Këto dy ditët e fundit, Rama ngjante si një ilustrim i K.TH Spirit, bam me këmbë e bam me duar, sepse është një varg që e ka shumë qejf ta përdorë.
Rama dje ishte njeriu më në vështirësi në planet, sipas meje, sepse po korrte atë që kishte mbjellë. Pra, kishte bërë një gafë shumë të rëndë, jo thjesht diplomatike, por që tregon mungesën e seriozitetit dhe ishte në njëfarë mënyre i ekspozuar përpara shqiptarëve dhe çdo faktori ndërkombëtar si njeri joserioz në minimumin e vet”, thekson deputeti i PD-së.
Sipas Patozit, Kryeministri e ka demonstruar se nuk e ka problem të ndryshojë në mënyrë ekstreme qëndrimet e veta. Por ajo që do të ishte më e rëndë, sipas deputetit demokrat, është fakti që ai të jetë keqpërdorur në favor të njërit kandidat në SHBA.
“Edi Rama nuk e ka për gjë për t’i ndryshuar qëndrimet e veta në mënyrë ekstreme. Ky ishte një ilustrim i kësaj gjëje, por mbi të gjitha edhe i keqpërdorimit të pozicionit publik për arsye politike. Në rast se do të jetë e vërtetë akuza se ai është keqpërdorur në favor të njërës palë në zgjedhjet amerikane, unë mendoj se Edi Ramën nuk ka jo avokat, por as psikiatër që ta marrë në dorëzim, sepse do të ishte tejkalim i çdo caku. Unë uroj që kjo të mos ketë ndodhur, por kjo prapë nuk e shpëton”, sqaroi Patozi.
