Astrit Patozi, ish-nënkryetar i PD ka folur lidhur me situatën brenda selisë blu.
Gjatë një interviste për “A2”, Patozi tha; “PD është e kapur në interesat personale të dy personave që i kanë shkaktuar dramën e saj dhe që nuk e lëshojnë sepse kanë objektiva shumë të qarta për karrierën e tyre. Në rast se nuk e bën dot ndryshimin e madh, PD më mirë të qëndrojë kështu siç është në disa copa. Një bashkim nën flamurin e “Skënderbeut” ndërkohë që sot nuk luftohet më me kuaj, por me raketa, sigurisht që PS-së nuk i sjell asgjë të mirë. PD nuk duhet të synojë sot një bashkim mekanik, qoftë edhe mes Foltores dhe Siglës, duke dërguar përfaqësi të njëri-tjetrit, në rast se nuk do të ndryshojë në koncept”.
Patozi foli për të ardhmen e partisë më të madhe opozitare në vend. Ai u shpreh më tej se Basha është kartë e djegur politike, ndërsa Sali Berisha është politikan pa perspektivë.
“PD është penalizuar për shkak të një kursi të gabuar, për shkak të një vizioni të gabuar, që sot përfaqësohet nga Lulzim Basha dhe Sali Berisha. Sado të ndryshojnë këta dy personazhe, nuk kanë më mundësi që të ndryshojnë dhe ta bëjnë partinë më të madhe për dy arsye. Së pari, Lulzim Basha është kartë e djegur politike. Së dyti, Sali Berisha është politikan pa perspektivë. Lulzim Basha nuk vlen as për opozitë, ndërsa Sali Berisha vlen vetëm për të qenë në opozitë. Në rast se PD ka ndërmend të rrijë gjithmonë në opozitë, sigurisht, mund t’i bashkohet Sali Berishës me shpresën që ky mund të bëjë ndryshimin nga Basha. Këtë ndryshim ai e bëri më 6 mars. Gjithsesi as kjo nuk do të ishte zgjidhje”, u shpreh Patozi.
