Gjatë një fjalimi në qytetin japonez Hiroshima, njërin nga dy qytetet që u sulmuan nga ushtria amerikane me bomba bërthamore në Luftën e Dytë Botërore, Papa Françesku dënoi përdorimin e armëve bërthamore dhe e cilësoi atë si “krim”.
“Përdorimi i energjisë bërthamore për qëllime lufte, jo vetëm që është krim kundër dinjitetit të qenieve njerëzore, por është kundër çdo të ardhmeje të mundshme në shtëpinë tonë të përbashkët”, tha Papa gjatë qëndrimit në Memorialin e Paqes në Hiroshima.
Më herët gjatë ditës, Papa vizitoi Nagasakin, ku bëri thirrje që bota të eliminojë armët bërthamore.
“Nagasaki fsheh në shpirtin e tij një plagë që dhemb përherë. Një vragë e shkaktuar nga vuajtjet e vazhdueshme prej humbjes së jetëve të mijëra viktimave të pafajshme të luftrave të shkuara dhe atyre aktuale me një Luftë të Tretë Botërore që po zhvillohet ngadalë. Le të ngremë zërin për ata që edhe sot po vuajnë pasojat e së shkuares nga ky mëkat i tmerrshëm”, iu drejtua kreu i Kishës të pranishëmve.
Papa Françesku arriti në Japoni më 23 nëntor, e cila është ndalesa e tij e radhës në kuadër të turneut aziatik që nisi në Tajlandë. Papa pritet të takohet me perandorin japonez, Naruhito, i cili mori fronin më 1 maj dhe po ashtu me kryeministrin japonez Shinzo Abe.
Kujtojmë se më 6 gusht 1945, SHBA-ja lëshoi bombën e parë bërthamore në Hiroshima, duke vrarë rreth 140 mijë persona, ndërsa tre ditë më vonë, bomba tjetër bërthamore vrau 74 mijë persona në Nagasaki./Opinion.al
