Sot në emisionin “Opinion”, në Tv Klan, në pjesën e parë të tij u diskutua në lidhje me krizën e provokuar nga lufta në Gjirin Persik. Edhe pse armëpushimi prej 48 orësh duket sikur e ka qetësuar disi situatën, u pa se fillimi i luftës solli një amulli, një rritje çmimesh në të gjithë botën, një lloj kaosi. Problemi qëndron se, kryesisht në Shqipëri, rritja e çmimeve për hir të krizave globale nuk i ka çuar më kurrë çmimet në nivelet paraardhëse, edhe kur krizat janë zgjidhur dhe kur gjithçka është kthyer në normalitet.
Në pjesën e dytë u trajtua një tezë se në Gjirin Persik, përtej krizës së naftës, ka edhe një krizë të madhe të Real Estate. Dubai, Abu Dhabi, Shahrein, Katari, Bahrein janë vende që synuan të kishin një rritje shumë të madhe, jo përmes naftës, por përmes investimit në turizëm dhe në Real Estate. Dubai ishte vendi me rritjen më të shpejtë në botë të kësaj sfere dhe befas ka kaluar në një ngrirje totale, kërkesa për të blerë është frenuar. Kjo krizë në këto vende flitet se mund ta spostojë Real Estate në Europë. Por a është Shqipëria një treg i mundshëm për këtë spostim? Cilat janë çmimet dhe a përputhen ato me standardin normal të jetesës dhe situatën e përgjithshme ekonomike të vendit.
Në pjesën e tretë, fokusi ishte në një nga fabrikat e mëdha të prodhimit të qumështit, tek “Lufra”. Fabrika është vizituar që te marrja e qumështit, deri në një rrugëtim të plotë të procesit të fabrikës. E nisur si një histori tipike në vitin 1991 me një çift, të cilët vendosën të ngrenë pak nga pak biznesin e tyre të vogël lokal, që më pas u kthye në biznesin më të madh të prodhimit të nënprodukteve të qumështit në Shqipëri.
Të ftuar: Agron Shehaj – Kryetar, Mundësia, Neritan Sejamini – Analist, Klodiana Kapo – Faktoje.al, Gent Beqiri – Ekspert Ekonomie, Juliana Nela – Remax Real Estate, Dritan Shakohoxha – Mikado Real Estate, Vjoldi Danaj – Ekspert Ekonomie, Arber Hitaj – Gazetar, në lidhje nga USA – Estela Ziu – Real Estate
