Seancat private të Arabisë Saudite për 11 të dyshuarit e akuzuar për vrasjen e gazetarit, Jamal Khashoggi shkelin ligjet ndërkombëtare dhe duhet të jenë të hapura për publikun dhe vëzhguesit gjyqësorë, ka thënë raportuesja speciale e Kombeve të Bashkuara, Agnes Callamard.
Ekspertja e të drejtave të njeriut të OKB-s ka dënuar mungesën e transparencës në hetimet që është duke kryer Mbretëria Saudite për vrasjen e gazetarit Khashoggit në konsullatën saudite në Stamboll tetorin e kaluar
Callamard u ka bërë thirrje autoriteteve saudite që të publikojnë emrat e të pandehurve, akuzat dhe vendimet e marra për të arrestuar.
“Procedurat aktuale janë në kundërshtim me ligjin ndërkombëtar për të drejtat e njeriut, i cili përcakton të drejtën për seanca të hapura. Qeveria e Arabisë Saudite gabon nëse mendon se këto procedura, do të përmbushin pritshmëritë e komunitetit ndërkombëtar”, ka thënë Callamard përmes një deklarate.
Prokurori Publik i Arabisë Saudite ka renditur në muajin nëntor 11 të dyshuar, por pa i paidentifikuar me gjeneralitete, duke përfshirë pesë persona që mund të përballen me dënim me vdekje, lidhur me akuzat për urdhërim dhe kryerje të krimit.
Disa shtete perëndimore bashkë me CIA-n besojnë se Princi saudit, Mohammed bin Salman, ka urdhëruar vrasjen, pretendim që kundërshtohet nga zyrtarët sauditë.
Megjithatë Callamard ka thënë se zyrtarët e lartë sauditë do të jenë “penalisht përgjegjës” nëse dështojnë që të hetojnë dhe ndëshkojnë ata që kanë përgjegjësi për këtë vrasje.
Kujtojmë se Khashoggi, kolumnist për Washington Post, i cili ka jetuar në Shtetet e Bashkuara, është vrarë në konsullatën saudite në Stamboll në tetor të vitit 2018. Zyrtarët sauditë fillimisht kanë mohuar vrasjen e tij, mirëpo pas presionit ndërkombëtar është kuptuar se trupi i tij është copëtuar në ambientet e ambasadës, gjithsesi ai nuk është gjetur ende./Opinion.al
