Sot shënohet 76 vjetori i çlirimit të Tiranës nga pushtimi nazi-fashist. Në kuadër të këtij përvjetori u mbajtën ceremoni pranë Ushtarit të Panjohur, ku mbajti fjalën kryetari i Bashkisë së Tiranës dhe më pas presidenti, Ilir Meta.
Por përveç ceremonive zyrtare, drejt Ushtarit të Panjohur marshuan veteranët dhe nostalgjikë të kohës së komunizmit, të cilët në duar mbanin dhe fotot të diktatorit, Enver Hoxha.
Nostalgjikë përshëndetën me grusht nën thirrjet “rroftë Partia Komuniste Shqiptare”. Ata kishin përgatitur një buqetë në formë ylli me trëndafila të kuq për të kujtuar sistemin komunist.
Në fakt, pas rrëzimit të sistemit komunist, në opinion publik dhe mes palëve politike ka pasur diskutime nëse manifestime të tilla duhen lejuar ose jo në vendin tonë. Por, mesa duket veteranët janë të vendosur që të gjithë meritën për çlirimin e Tiranës t’ia japin Partisë Komuniste dhe Enver Hoxhës./ Opinion.al
