Nga DESADA METAJ
Asnjë zyrtar i PD nuk shkoi dje për të uruar pranë komunitetit myslyman për festën e Kurban Bajramit. E gjithë selia prej disa ditësh u transferua në Dibër, atje ku zgjedhjet për kryetarin e ri të bashkisë u shndërruan në një test elektoral të paralajmëruar nga Lulzim Basha dhe që u prit me shumë interes për publikun.
Edhe më entuziastët e socialistëve dhe më skeptikët e demokratëve nuk e kishin parashikuar një rezultat të tillë, një hendek kaq të madh mes kandidatëve që vetëm 1 vit e gjysëm më parë ishin ndarë me diferencën prej 300 votash.
As skandali i largimit të Shukri Xhelilit, as bandat e frikës që Edi Rama çoi ne Dibër, as ekonomia në rrënim… asgjë nga këto nuk e ndihmuan PD të ishte në mos fituese, të paktën humbëse dinjitoze. Sepse kur punët brenda partisë nuk janë në rregull, nuk mund të kërkosh të fitosh besimin e votuesve të lodhur nga premtimet që nuk i mbajte 8 vitet e pushtetit.
Një parti e tërë e zhvendosur në Dibër u tregua e pazonja të ngjallte besim tek njerëzit e zhgënjyer, sepse u përfaqësua nga burokratë pa emër e pa ngjyrë për të cilët zor se votojnë dhe njerëzit e shtëpisë. Në emër të partisë më të madhe në opozitë kërkuan vota politikanë ose të panjohur dhe pa pikë grinte, ose fosile që më së shumti përpiqen të fshehin pasuritë e vëna në 8 vjet.
Në emër të demokratëve kërkoi votën një kandidat që përtej cilësive të tij nuk arriti të votonte as për veten sepse ka 20 vjet që nuk jeton atje. Dhe të gjithë sa më sipër harruan që votën ja kërkuan atyre që ndoshta më parë kanë votuar për PD, por që sot nuk janë më naivët e viteve më parë dhe shpresën që mund të jenë më mirë nuk e moren dot nga opozita.
Ky është dhe gabimi më i madh i PD sot. Një parti që nuk ngjall më shpresë, nuk frymëzon më askënd në një vend ku ekonomia po rrënohet çdo ditë dhe politikat në fushën e shëndetit apo arsimit duken thjesht test për durimin e qytetarëve. Pikërisht në këto kushte, Lulzim Basha regjistron dhe humbjen spektakolare me më shumë se 4 000 vota diferencë. Pavarësisht pretendimeve të tij për dhune, banditë apo blerje votash (disa prej të cilave janë të vërtëta) partia dhe strukturat që ai drejton nuk arritën të denonconin asnjë rast serioz,veç 3 shkeljeve nga ato që rëndom ndodhin ditën e zgjedhjeve në Shqipëri.
Unë jam e bindur që qeveria ka mjete dhe pushtet për të manipuluar dhe blerë votuesit, madje besoj që dhe banditët e atjeshëm dhe ata qe u eksportuan ngjallin frikë tek votuesit e ndershëm.
Por çfarë bënë për kaq ditë me radhë strukturat apo të dërguarit e PD?
Çfarë denoncimesh serioze sollën ata për publikun?
Sa besim ngjallën ata tek votuesit tradicionalë dhe ata të zhgënjyer nga qeverisja?
Si mund të dërgosh njerëz apo deputetë që nuk kanë qenë asnjëherë deri ne Peshkopi për të kërkuar vota ndërsa dega lokale e partisë është pa kryetar dhe krejtësisht kaotike.
Këto dhe të tjera janë arsyet e këtij rezultati të turpshëm që më shumë se trishtim ngjallin mosbesim tek të gjithë ata që jo vetëm janë votues tradicionalë të PD por dhe shumë të tjerë që zhgenjehen çdo ditë e më shumë nga qeveria e rilindjes.
Ndaj mendoj se nuk ka më kohë për justifikime, as për ato nën zë që fajin e ka “Ai” që dikur e drejtonte siç dinte ai PD. Sepse kjo ishte sfida e parë jo vetëm personale por dhe si kryetar i vetëm i demokratëve për Lulzim Bashën. Dhe me gjasa i vetëm ai do të jetë edhe në zgjedhjet e ardhshme parlamentare, ku as zoti nuk do e ndihmojë nëse nuk ulet seriozisht e të merret me partinë që sot është në ditët e zymta të saj. As lyerjet e fasadës, as deklaratat me zë të lartë dhe as flirtimet e paqarta politike nuk do ta ndihmojnë dot, nëse deri në qershor nuk arrin të gjejë e të mbledhë pas vetes njerëz që ngjallin besim e që i japin frymë votës se djathtë e asaj opozitare në Shqipëri.
/Opinion.al
