Kreu i PD Sali Berisha në konferencën e përjavshme për mediat u pyet nga gazetarët sa i përket nismës së PS-së për të zbuluar politikanët bashkëpunëtorë të ish-sigurimit.
Berisha tha se në vitin 1996 dhe 2008 ka votuar në parlament ligjin e lustracionit sipas të cilit duhet të largoheshin nga detyrat si të zgjedhur apo në sistemin e drejtësisë të gjithë ata që kanë qenë bashkëpunëtorë të sigurimit.
Ai tha se në vitin 2015 Rama mori përsipër të hartojë ligjin por duke hequr lustracionin. Berisha theksoi se PD ka qenë, është dhe do mbetet nismëtare për çdo formë lustracioni.
Më tej ai u ndal edhe te shpallja non grata duke theksuar se Edi Rama është i pashpresë.
“Partia Demokratike në vitin 1996 dhe 2008 ka votuar në parlament ligjin e lustracionit sipas të cilit duhet të largoheshin nga detyrat si të zgjedhur apo në sistemin e drejtësisë të gjithë ata që kanë qenë bashkëpunëtorë të sigurimit. Ky ligj u zbatua në vitin 1996 plotësisht. U amendua një vit më vonë nga PS. Nuk u anulua por u hoq lustracioni që e bëri për mua, e zhvlerësoi ligjin. Në vitin 2008 ne rikthyem të njëjtin ligj. Sepse e kishte mbajtur Gjykata Kushtetuese e Shqipërisë.
Kishte një miratim ndërkombëtar në kuptimin që për herë të parë e kishte hartuar presidenti i Çekosllovakisë. Në vitin 2008 u rikthyem përsëri te ai ligj. Ne e votuam por në mënyrë të padrejtë e anuloi Gjykata Kushtetuese duke pasur 5 anëtarë të saj në konflikt interesi. E autorizoi dhe Gjykata Kushtetuese. Edi Rama ishte ai që paditi ligjin. Ky ligj i njeh të drejtën çdo qytetari shqiptar të njihet me dosjen e tij.
Secili, ka apo nuk ka dosje kishte të drejtë të kërkonte të njihej me të. Në këtë aspekt ligji ishte një transparencë të plotë. Nuk ishte asnjë dokument të paklasifikueshëm. Ligji u anulua dhe në vitin 2015 Edi Rama mori përsipër të hartojë ligjin por pa lustracionin. Pak a shumë nuk mund të mohohet. Zgjodhi modelin gjerman. Modeli gjerman nuk ka lustracionin.
Unë kam takuar drejtuesen e këtij institucioni. PD ka qenë, është dhe do mbetet nismëtare për çdo formë lustracioni. Ne jemi që çdo qytetar të ketë të drejtë të njihet me dosjen e tij. Çdo kush tjetër përveç atij. Nuk ka askush të drejtë të merret më shumë me dikë se parashikon ligjin. Sa u përket non gratave, Europa ka ligjet e veta. Unë nuk kam asnjë lloj impresioni nga ajo. Edi Rama është i pashpresë”, u shpreh Berisha.
