Presidenti i Republikës Bujar Nishani deklaroi sot se nuk mund të hedhë shortin për emërimet e anëtarëve të Këshillit të Emërimeve në Drejtësi.
Nishani ka sqaruar se kjo nuk mund të ndodhë pasi mungon ligji i posaçëm që përcakton kriteret e tjera për kualifikimin e kandidatëve.
Nishani thotë se “në mungesë të ligjeve që përcakton kriteret e tjera të kualifikimit të kandidatëve për t’u zgjedhur në Këshillin e Emërimeve në Drejtësi apo edhe të ligjit të organizmit dhe funksionimit të organeve që do të bëjnë rivlerësimin e anëtarëve të përzgjedhur me short, ky short do të ishte joefektiv dhe nuk do t’i shërbente aspak qëllimit për të cilin u bënë edhe ndryshimet kushtetuese.”
Presidenti zhvilloi javën e kaluar një takim me konstitucionalistë dhe ekspertët të jurisprudencës për procesin e përzgjedhjes të KEDs si dhe me krerët e grupeve parlamentare për ta zgjidhur me konsensus këtë vakum ligjor, që kërkon kohën e vet.
Ai i ka kërkuar palëve politike që të angazhohen për të miratuar ligje të domosdoshme për zbatimin e Kushtetutës.
