Kryetari i Partisë Demokratike Lulzim Basha, ditën e sotme, në një takim me të rinjtë nga “Çadra e Lirisë” i ka kërkuar kryeministrit Edi Rama të japë dorëheqjen.
Në fjalën e tij, Basha theksoi se ‘18 Shkurti’ është dita kur Shqipëria ka nisur ndryshimin pa kthim. Ndërsa tregoi se opozita dhe qytetarët prej tre javësh janë në çadër dhe do të jenë, deri në arritjen e objektivave të shpallura; garantimi i zgjedhjeve të lira dhe të ndershme përmes largimit të Ramës dhe një qeverie që i garanton ato.
Ai deklaroi se kjo është mënyra e vetme për të pasur zgjedhje të lira dhe të ndershme në vend.
“Qeveria me Ramën në krye, janë sot, lepujt e vërtetë të vendit se të gjithë jemi ngritur bashkë, shqiptarët janë ngritur. Është e vërtetë, miku im gazetar ka të drejtë, ndryshimi tashmë ka mbërritur. 18 shkurti është dita kur Shqipëria ka nisur ndryshimin pa kthim”, tha Basha.
Më tej, në fjalën e tij, kreu i opozitës iu referuar deklaratës së kryeministrit Rama të bërë nga Berlini, kur tha: integrim para se të jetë vonë.
Sipas Bashës, ky është një kërcënim ndaj Gjermanisë dhe Europës pa realizuar ende detyrat e shtëpisë.
“Kë kërcënon ky, kërcënon Gjermaninë, Evropën? A i ke bërë detyrat e shtëpisë o Ed mashtruesi, a e ke luftuar krimin, jo, e ke ulur në krye të bashkive, drekon e darkon me kriminelët, iu ke dhënë çelësat e doganave, tatimeve dhe policisë. Je ngelës, a e ke luftuar korrupsionin? Jo, përkundrazi raportet e kanë të shkruar troç, korrupsioni është i përhapur në çdo degë të qeverisjes shqiptare. Si do e fusësh o Ed mashtruesi në Evropë Shqipërinë, kujt i thua ti integrim para se të jetë vonë?”- tha Basha.
Kreu i opozitës, Lulzim Basha, përgjatë fjalës së tij nuk harroi t’i kujtojë kryeministrit Edi Rama se është me krimin në pushtet, i cili e ka kthyer vendin në hambar droge. Për Bashën, Edi Rama, është pengesa kryesore për Shqipërinë Europiane.
“Nëse kërkon integrim para se të jetë vonë, jep dorëheqjen. Largohu dhe hapi rrugë qeverisë teknike si garancia e vetme që kjo levizje do të pranojë, zgjedhje të lira dhe të ndershme, tha Basha.
