Parlamenti rus i hap rrugë arrestimit të qytetarëve të tij, nëse këta të fundit nuk “respektojnë” zyrtarëve qeveritarë ose shtetërorë, përfshirë presidentin rus, Vladimir Putin. Ligjvënësit miratuan këtë të enjte një ligj kundërthënës, i cili u lejon gjykatave t’i burgosin njerëzit për “mosrespektimin” e zyrtarëve të lartë.
Sipas kritikëve, ligji të kujton legjislacionet e periudhës sovjetike kundër disidentëve politikë. Ai parashikon gjoba në vlerë deri 100,000 rubla apo 1,300 euro, për “postimet e pahijshme online”, të cilat tregojnë “mungesë respekti për shoqërinë, vendin, simbolet shtetërore të Rusisë, Kushtetutën ose autoritetet”.Shkelësit e përsëritur mund të goditen me gjoba dyfish ose me 15 ditë burgim.
Alexander Verkhovsky, udhëheqës i Qendrës Sova në Moskë, e cila monitoron abuzimet me legjislacionin kundër ekstremizmit, tha se njerëzit mund të përballen me persekutim për komentet online, të tilla si “Putini është bastard”, ose për shaka për Parlamentin.Të tjerë thanë se ligji u formulua në mënyrë të paqartë, çka mund të sjellë që çdo kritikë online për autoritetet, përfshirë satirat, mund të interpretohet si “mosrespektim”.
“Së shpejti, do të tregojmë shaka për autoritetet duke pëshpëritur në kuzhinë”, tha Sergey Shvakin, avokat me seli në Moskë, në një postim në Facebook.
Ligji, i cili është hartuar nga Andrei Klishas, senator nga partia e Putinit – Rusia e Bashkuar – u kritikua edhe nga disa ligjvënës dhe zyrtarë qeveritarë.
“Një nga detyrat e organeve qeveritare është të dëgjojnë me qetësi kritikat për punën e tyre”, tha për gazetën “Vedomosti” zëvendësministri i Komunikacionit, Aleksei Volin.
“Nëse ne nuk e quajmë budallain budalla, ai nuk do të ndalojë të jetë budalla”, tha Sergei Ivanov, një deputet i partisë nacionaliste LDPR, e cila zakonisht e mbështet Kremlinin mbi çështjet e mëdha.
Por hartuesi i ligjit mohon faktin se ligji është një formë censure, duke deklaruar se autoritetet “janë të denja për respekt”. Putin pritet ta nënshkruajë ligjin në ditët e ardhshme.Parlamenti rus miratoi gjithashtu një legjislacion të veçantë, të autorizuar po nga Klishas, që do t’iu japë autoriteteve kompetenca për të bllokuar faqet në internet që publikojnë materiale “mosrespektuese” ose “lajme të rreme”. Të gjitha këto masa vinë në një kohë kur vlerësimi publik për Presidentin rus Vladimir Putin ka rënë në 33%, që është niveli më i ulët në 13 vjet./Opinion.al
