Hugo Ross Phillips është gjashtë vjeç, por ndryshe nga bashkëmoshatarët e tij nuk mund të vrapojë, të luajë futboll, madje as të qëndrojë shtrirë, pasi sëmundja me të cilën ‘’bashkëjeton’’ që prej ditës kur erdhi në jetë, mund të rezultojë fatale. Ishte vetëm dy vjeç, kur mjekët e diagnostikuan me ‘’tracheobronchomalacia’’ ose shkurt TBM, një sëmundje shumë e rrallë e aparatit të frymëmarrjes, që çon në ngushtimin e rrugëve respiratore nëse ai qëndron në pozicion horizontal.
‘’Dy vitet e para të Hugos kanë qenë një makth i vërtetë. Sa herë që ai shtrihej për të fjetur, buzët e tij nxiheshin dhe ritmi i frymëmarrjes bëhej më i çrregullt, saqë dukej sikur do të kalonte në kolaps nga momenti në moment. Mjekët më kanë gënjyer, duke më thënë se nuk ishte asgjë e parrezikshme, derisa kur arritën më në fund ta diagnostikonin në‘’Evelina Children’s Hospital’’.
Që prej asaj kohë e deri më sot unë qëndroj zgjuar dhe mbaj kokën e tij vertikalisht, në mënyrë që ai të mos mbytet dhe vdesë. Kam gjithashtu një djalë tjetër,Henry, i cili ka nevojë për ndihmën dhe përkujdesjen time, por e gjithë vëmendja ime është e përqendruar tek Hugo. Sëmundja e Hugos është edhe shkaku kryesor përse unë dhe bashkëshorti im u ndamë.
Mjekët më kanë këshilluar që t’i vendosim disa unaza metalike në rrugën e frymëmarrjes, çka nënkupton se Hugo duhet t’i nënshtrohet ndërhyrjeve kirurgjikale çdo gjashtë muaj. Por nuk mund t’ia shkaktoj këtë dhimbje. Preferoj të qëndrojë zgjuar, të izolohem nga jeta sociale dhe gjithçka tjetër për të.’’-përfundon rrëfimin e saj mamaja Helen Ross, e cila së fundi ka hapur një fushatë online ‘’Hugs 4 Lungs’’ ku ofron ndihmën e saj për ata prindër që ndodhen në të njëjtën gjendje.
