Vendimi për çeljen e negociatave me Shqipërinë dhe Maqedoninë e Veriut mund të ngelet për në Samitin e Zagrebit në Maj të vitit 2020.
Pas një diskutimi të gjatë deri pas mesnate, liderët e vendeve anëtarë të BE-së janë tepër të ndarë sa i përket kësaj çështjeje. Shumica e vendeve mbështesin çeljen e negociatave me të dyja vendet por Franca duket se ka vënë veton për “JO”.
Megjithatë ka diferenca edhe përsa i përket të dyja vendeve në këtë proces. Në rastin e Maqedonisë së Veriut, të gjitha vendet përveç Francës, janë në favor të hapjes së negociatave duke parë reformat që ajo ka ndërmarrë, ndërsa në rastin e Shqipërisë, lista e skeptikëve është më e gjatë duke përfshirë Holandën, Danimarkën edhe Spanjën të cilët nuk shohin mjaftueshëm progres.
Në diskutimet e këshillit u hodh edhe teza për ti ndarë këto dy vende në këtë proces, vendim ky i mbështetur nga kryeministri holandez, Mark Rute. Por kjo është kundërshtuar nga Gjermania e cila kërkon një vendim të përbashkët për të dyja vendet.
Kryeministri bullgar tha se do të ishte “gabim i madh” nëse vendeve nuk do ti çelen negociatat.
Por arritja e një vendimi kërkon unanimitet mes vendeve, si në rastin e një “PO-je” dhe një “JO-je”.
Kjo ka ngritur mundësinë që Këshilli të mos dalë sot në një vendim për Shqipërinë dhe Maqedoninë e Veriut. Këtë gjë e konfirmoi edhe kryeministri i Letonisë, Krisjanis Karins, teksa hynte në sallën e mbledhjes së takimit të sotëm.
“Zgjerimi është shumë i rëndësishëm për ne, por jo të gjitha vendet janë dakord për hapjen e negociatave. Kërkohet vendim unanim”, deklaroi Karins.
Kryeministri i Luksemburgut tha gjithashtu se nuk do të ketë një vendim ditën e sotme.
Përkrahësit e Maqedonisë së Veriut dhe të Shqipërisë shpresojnë që të paktën të miratohet një tekst me një mesazh të qartë politik në favor të një të pranimi të sigurt për të ardhmen, i tha një burim diplomatik EURACTIV.
Franca, Gjermania, Holanda dhe Danimarka raportohet se po konsiderojnë një kompromis për të shtyrë bisedimet në prill të vitit 2020 ose samitin e paralajmëruar mes BE dhe Ballkanit Perëndimor në Zagreb majin e ardhshëm, i cili do të hapte një dritare për një reformë të mundshme të procesit të zgjerimit të cilën e kërkon Franca . /Opinion.al
