Një artikull tronditës i Washington Post, përshkruan hap pas hapi se çfarë do të ndodhte nëse një shtet armik do të lëshonte raketa bërthamore kundër Shteteve të Bashkuara.
Edhe pse SHBA-të zotërojnë teknologji të avancuar mbrojtjeje dhe kapacitet për kundërsulm, koha e shkurtër prej vetëm 45 minutash nga momenti i lëshimit të raketave deri te shpërthimi nuk do të mjaftonte për të shmangur katastrofën.
Sipas skenarit të rindërtuar nga dokumente të deklasifikuara dhe dëshmi të ish-zyrtarëve, vetëm pak minuta pas lëshimit të raketave, qindra mijëra qytetarë amerikanë do të humbnin jetën në çast. Miliona të tjerë do të vdisnin më pas për shkak të rrezatimit. Dhe menjëherë pas kësaj, do të pasonte kundërpërgjigjja amerikane një tjetër valë vdekjeje që do të përfshinte vendin agresor.
Zona të tëra të planetit rrezikojnë të bëhen të pabanuara për dekada, njësoj si Çernobili. E gjithë kjo do të ndodhte brenda një ore.
Si fillon gjithçka: alarmi në hapësirë
Nëse, për shembull, Rusia, Kina apo ndonjë vend tjetër armik do të lëshonte një seri raketash balistike ndërkontinentale me koka bërthamore, satelitët amerikanë të udhëhequr nga Forcat Hapësinore të SHBA-ve do të zbulonin menjëherë lëshimet përmes sensorëve infra të kuq që kapin tymrat dhe flakët e motorëve të raketave.
Një minutë më pas, të dhënat do t’u transmetoheshin agjencive të sigurisë kombëtare amerikane: Komandës së Mbrojtjes Ajrore të Amerikës së Veriut (NORAD), Komandës Strategjike (STRATCOM) dhe Qendrës Kombëtare të Komandës Ushtarake (NMCC) në Pentagon. Brenda pak minutash, këto agjenci do të vlerësonin nivelin e besueshmërisë së alarmit – në këtë rast, mesatar.
Brenda pesë minutave: njoftohet Presidenti
Presidenti i SHBA-ve, kudo që ndodhet, njoftohet menjëherë. Nëse ndodhet në ajër me avionin presidencial “Air Force One”, do të ulej në dhomën e operacioneve brenda avionit. Aty i paraqitet “valixhja bërthamore” një çantë e zezë që përmban dokumentet dhe kodet për të autorizuar një sulm bërthamor në kundërpërgjigje. Në brendësi të saj ndodhet edhe i ashtuquajturi “libri i zi” me 75 faqe, ku përshkruhen të gjitha opsionet e sulmit, të shkruara me të kuqe.
Një video-konferencë emergjente organizohet me komandantin e STRATCOM, ndërkohë që, nëse janë të disponueshëm, bashkohen edhe Sekretari i Mbrojtjes dhe Shefi i Shtabit të Përgjithshëm.
Vetëm 45 minuta kohë për të reaguar
Nga momenti i nisjes së raketave e deri te goditja e tyre, kalojnë vetëm 30 deri në 45 minuta një kohë shumë e shkurtër për të marrë vendime që do të përcaktojnë fatin e miliona njerëzve.
Reagimi i SHBA-ve është një mister i ruajtur me fanatizëm. Por fakti që shumica e vendimeve varen nga protokolle të gatshme tregon se procesi është i paracaktuar dhe i centralizuar për të garantuar një përgjigje sa më të shpejtë.
Evropa, në gatishmëri për emergjencat bërthamore
Ndërkohë, Bashkimi Evropian ka filluar të përgatisë qytetarët për skenarë emergjence, përfshirë edhe mundësinë e një sulmi bërthamor. Në disa vende janë publikuar udhëzues për ndërtimin e “kit-eve të mbijetesës”, të ngjashëm me ato të Luftës së Ftohtë.
Në një botë gjithnjë e më të tensionuar, ku fuqitë e mëdha testojnë vazhdimisht kufijtë e sigurisë globale, ky skenar i Washington Post nuk është më vetëm një imagjinatë distopike, por një paralajmërim i ftohtë dhe real për atë që mund të ndodhë në vetëm 45 minuta./tvklan
